100

Queen Candace confronts Alexander.

That day Alexander ete wit quene Candace & hir childire.
Apon the morne quene Candace tuk Alexander by the right
hande & ledd hym in-till hir bedd-chambir, and nane wit tham,
Bot thay twa allan. This chambir was couerde all ouer wit-in
wit golde & precious stanes. And it schane wit-in, as it had
bene the sonne. And oute of this chambir scho ledd hym in-till
a wit-drawyng chambir made of cypresse. This chambir was sett
apon foure wheles by crafte of clergy; And twenty xx Oly-
phauntis drewe it whedir as scho wolde hafe it. And when
Alexander & the quene ware entrede in-to that chambir, onane
it stirredd & by-gan for to remowe. And than Alexander
was astonayde & meruaylled hym gretly & said vn-to the
quene: 'For sothe,' quoth he, '& thir meruaills ware in oure
cuntree thay ware riyte commendable & mekill worthy to be
praysede.' The quene answerde: 'thou saise sothe, Alexander,'
quoth scho, 'thay ware mare commendable amangey the Grekey,
than amangey vs.' And also sone als Alexander herde hys
name be neuenede, he was gretly trubblede, and his vesage
bi-gan to waxe pale, and his chere to change. And than the
quene said efte vn-to hym: 'Alexander,' quoth she, 'for to schewe
the mare verrayly that thou ert Alexander, com with me.' And
than scho tuk hym by the hande & leedde hym in-till another
chambir, and schewed hym thare his awenn Fygure purtrayed in
a parchemyn skyne. And when Alexander saw that, he wex
pale & wanne & biganne to tremblee. And than the quene said
vn-till hym: 'Alexander,' quoth scho, 'where-fore ert thou ferde,
& why chaungey thow chere. Thou that hase distroyed all the
werlde; conquerour of Perse, of Inde, of Mede, and many other
rewmes & landey, Now arte thou witowtten scheddynge of blode
fallen in the dawngere & in the handey of quene Candace vnauysyli.
And thare-by may thou wele knawe that a manes hert sulde on na
wyse be enhanced in pride. For if all it bee that ofte tymmes
grete prosperitee fall to man, Sodaynly falley adversitee till
hym when he leste wenes.' When Alexander herde this he
bigan to grayste wit the teethe and to torne his hede hedir
& thedir. And quene Candace saide vn-till hym: 'Whare to
angers thou the,' quoth scho, ' & trubley thi selfe? What may
now thi grete Imperiall glory, thi witt & thi mighte serue