fol. 3v

¶ In prose in metre entrechaungyngly.
with wordes sette in coloure wondre wele.
of rethoryk endyted craftely.
and schewed wele þis welthe is temp[er]ele.
and not to be desired. not a dele.
ne worldly myschief no þing for to drede.
enforsinge us . by resoun naturele.
to vertu . fully for to taken hede.
¶ Whan .Ansastasius. had made his fyne
As tyme of age . in to his deth . hym drewe
than aftre hym was emperoure .Iustyne.
A. noble knyght . a feithfull . and a. trewe.
For cristes lawes . wondre wele he knewe.
and kept hem . as. a . verrey cristen . man.
and heretikes fast he gan pursewe
þat . arrians weren y cleped þan.
¶ His lettres in to Rome þan he sent.
For to destroye all that heresy
And fully [g]af hem . in comaundement.
þat þey shulde put hem out of company.
Theodoricus. toke wondre hy.
For he hym self was onely one of þo.
þis message he repelyd uttrely.
and made avowe . þat hit shulde not be so.
¶ And swore . but [g]ef þe . Arryans must
have full pece . graunted hem . a[g]en[?]
he wold not leve one in all þe coste.
of cristen . feith . þat he ne shulde be slayve .
And þus he bad þe messagers sayve.
[Th]at yf he wolde wiþ Arryans stryve.