Page 439

semons tel,” et nomer le, “par le comandement de mon seignor tel,” et nomer le seignor aussi, “en cest leuc où tel est assené de son fié que il tient de mon seignor tel,” et puis dire le remanant qui est devant mouti de la semonce. Et se le seignor treuve celui que il viaut faire semondre en la presence de lui et de sa court, ou il le face là venir, tot aussi le peut il meismes semondre ou faire semondre si come il est dessus mouti. Et se le seignor a besoin de lui à cheval et as armes, il li deit faire dire en la semonce, et deit moutir le leuc où il vodra que il voisse et le terme de combien qu'il vodra que il y seit.

XIII. Et si est assise ou usage que de ce qui monte à fait de fié dont seignor se treuve saisi et tenant, que bailli ne deit oyr plaît ne question de previlege devant lui.

XIV. Et tot aussi est il de ce dont l'orne se treuve saisi et tenant en tens de seignor, que il ne deit respondre devant baill, fors devant son seignor qui est tenus à lui de fei.

XV. Et si est assise ou usage que puis que deus fiés ou plus sont escheus de par un home et il deivent homage en chief et servise de cors, et il a pluisors heirs qui les peussent desservir de leur cors tot ensi come les fiés les deivent; que l'ainz né deit aveir un des fiés à chois, et l'autre heir après deit aveir l'autre fié, et le tiers heir deit aveir l'autre fié, et ensi le deit estre de l'un heir après l'autre, de tant d'eirs come se trovereit en un degré de parenteys des fiés qui sereient escheus de par un home, et qui homage en chief et servise de cors devront. Et c'il ne deveent homage en chief ne servise de cors, l'ainz né les aureit toz, puisque il poreit faire ce que les fiés devreient.

XVI. Et si est assise ou usage que celui qui a fié de son conquest le peut rendre et quiter à celui meismes qui li a doné, en tel maniere que il, ne heir que il ait, n'i aura jamais riens: et ce et aucunes autres choses peut l'on faire de son conquest, que on ne peut pas faire de ce qui aucune feis fust venu jusque à heir ou d'eir en heir.

XVII. Et si est usage ou assise que se deus freres esteient, et leur pere morust qui eust un fié qui servise de cors deust, l'ainz né l'aurait devant toz. Et ce après ce leur mere moreust qui eust un autre fié qui servise de cors deust et homage en chief, si l'aureit aussi l'ainz né come d'escheete et le fereit desservir d'un chevalier, et l'omage fereit si come il devreit, c'est assaveir sauf ciaus à qui il aureit fait devant homage. Ne jà tant ne poreient ensi escheyr de fiés en cest reiaume, mais que l'un fust après l'autre, que celui qui l'ainz né aereit ne les eust toz, et son frere mains né de lui n'en aureit riens. Mais ce il escheeient ensemble de par une persone, l'ainz né aureit l'un à chois, et le mainz né aureit l'autre, là où il deussent servise de cors. Et si tost come pere