Page 443

la fei que il li deivent, que il voissent devant le seignor et le requierent que il le maint par sa court come son home: et il y deivent aler et faire ce que leur per lor a requis. Et se le seignor ne vosist faire leur requeste, il deivent et pevent dire au seignor que il ne feront riens por lui tant que il ait fait leur requeste; et par treis feis li deivent dire: et c'il por tant ne le fait outreement, il le pevent gagier de leur servises tant que il aient acompli leur requeste.

XXXII. Les genz qui ne pevent porter garentie en la Haute Court contre Frans, si sont:
Toz ciaus qui ne sont de la lei de Rome;
Et toz forjugiés;
Et toz parjures;
Et toz ciaus qui sont fei mentie;
Et toz champions vencuz;
Et toz ciaus qui ont reneié Dieu;
Et toz ciaus qui ont servi Sarrazins ou autre mescreanz as armes contre Crestiens, plus d'un an et un jor;
Et ciaus qui ne sont nés de leau mariage;
Et toz sers de quelque lei que il seient;
Et toz ciaus qui sont parti de religion, se il ne l'ont par jugement de l'Yglise;
Et toz ciaus qui sont entechiés des vices devant dis, perdent vois en court, se l'on les viaut oster.