Page 449

XVI. Le XVI° chapistre. Si parole des douaires des chevaliers.

L'usage des douaires par l'assise est tel: que quant l'ome muert, de toutes les choses, queles que eles soient, muebles et stables, que l'on li truve, se il chevalier est, sa feme en doit avoir la moitié, puis que l'on aura paié la dette dou mort. Et la dette doit estre paiée dou mueble. Et se il ne fornist à paier la dette, ce que est en defaute, l'oir en paie la moitié, et la feme l'autre moitié. La feme ne puet riens faire de ce que ele a en douaire, qui fié ou heritage, mais que joïr des rentes sa vie. Et ceste assise est des chevaliers.

XVII. Le XVII° chapistre parole de desmembré et de partir le fié et porquoi.

Nul fié ne doit estre parti ne desmenbré, se ce n'est par trois choses. L'une, que l'on en doinst partie pour partie dou servise faisant, se il doit autre servise que d'un escu, selonc le servise que le fié doit, et si en doit mains doner de la moitié. L'autre maniere por quoi fié se part, si est pour douaire; quar la feme en a la moitié pour son douaire, que que le fié soit. La tierce maniere, quant il n'i a hoir et y a filles, plus d'une escu, si part par chevaliers, selonc ce que il y a filles et chevaliers. Mais une chevalerie ne se part mie, ainz l'a toute l'ains née, quant le fié n'est que d'un escu.

XVIII. Le XVIII° chapistre parole de l'assise de la vente des fiez et porquoi il se vendent.

L'assise dou fié vendre est tele: que fié ne puet estre vendu par dette. Et enssi: que ceaus à qui l'ome doit, doivent venir devant le roy et clamer soy de celui qui leur doit l'avoir. Et se celui conoist la dette, ou il en est ataint par preuve, le roy li doit comander que il paie cele dette dedenz sept jors. Celui puet dire lors, ou amprès les sept jors: "Sire, je n'ai de quoi paier ceste dette que de mon fié, je le vos livre, que le vendez par l'assise et en paiez ma dette." Le roy le doit faire recevoir et faire crier en trois citez, par quatre jours. Et le criour doit nommer toutes les choses qui sont dou fié, et le servise que il doit, et à chascun jour dire: "De hui en quarante jours." Et amprès les quarante deus jours, ceaus qui veulent metre doivent venir devant le roy en la court, et lors doit le criaor dire le plus que on y a mis et crier le à tant, et motir les choses dou fié, et le servise et l'omage à quex hoirs. Et quant nul n'i met plus, le roy doit comander que il le livre à celui qui plus y a mis. Et le criaor doit dire les trois moz et livrer le à celui qui plus y aura mis; et celui, livrer les besanz au roy. Et lors celui de qui le fié fu, jure sur la sainte Evangile que cele dette, qui est motie et concue en la court, doit, et que il n'i a fait barat ne malice. Et puis jure que il n'a autre chose, à couvert ne à descouvert, mueble ne estable, que le fié, de qui il puise paier cele dette qui est motie. Mais se il a ou reaume autre fié, il puet bien dire: "Fors tel fié." Et