untitled page 2

conoissons bien que voz estes tel come voz avés dit, et somes prest et apareillés maintenant de faire ce que voz avés requis, faisant voz tot premier, si come voz l'avés offert, ce que vos faire noz devés.” Lors deit estre aportée l'Evangille, et le seignor se deit agenoillier et metre la paume destre dessus, et un des homes deit deviser ensi et dire: “Sire, voz jurés sur les saintes Evangilles de Dieu, come Crestien, que voz garderés et sauverés, et maintendrés et defenderés de tot vostre leau poeir sainte Yglise et veves et orfenins, partot cestui reiaume, en leur dreis. Et encores, par vostre dit sairement, tendrés et ferés tenir et acomplir de tot vostre leau poeir les bons uz et les bones costumes et les assises qui furent ordenées et faites ou dit reiaume, c'est à entendre par tot le reiaume. Et encores, par vostre dit seirement, de tenir et de maintenir et faire tenir les dons et les previleges que voz ancestres ont donés et fais en cest reiaume; et se aucun contens y eust ès dons ou ès previleges que il ont fais,que voz ciaus contens ferés determiner par l'esgart ou la conoissance de vostre court. Et encores estes tenus, par vostre dit seirement, de tenir et de mainteir et de faire tenir et d’acomplir, de tot vostre leau poeir, justice.” Et après que ces dessus dites choses seront complies, le seignor se deit seyr; et les homes l'un après l’autre deivent venir devant lui, et chascun à faire son homage se deit agenoillier et metre ces mains jointes dedenz celles dou seignor; et un autre des homes deit dire: “Tu fais lige homage à mon seignor le rei, por fié que tu as et tiens, lequel tu deis tenir de lui; et li promès de garder le et de sauver come ton seignor lige contre totes riens qui vivre et morir puissent. Et il t’en receit en Dieu fei et en la soe come son home lige, de voz dreis sauvé les siens.” Et chascune des parties deit comfermer le dit et dire “Oyl,” et puis se deivent baisier en fei. Et toz les homes liges qui ou reiaume sont ou seront deivent aveir fait ou offert à faire ou seignor, dedenz les quarante jors, leur homage. Et encores deivent les dis homes, à la requeste dou seignor, faire feauté, c’est assaveir jurer sur les saintes Evangilles de Dieu de garder et de sauver et de defendre contre totes riens le cors dou seignor et ces villes et ces chastiaus et son reiaume à lui, et, après lui, à ces dreis heirs.

II. Et les homes liges chevaliers, qui deivent servise de cors por leur fiés, deivent servir le seignor as armes d'un cheval et d'autre deus chevaucheures; et encores deit servir à venir fair ces comandemenz, espesaiaument à estrà la court as plais et as requestes, et aler au conseil de celui à qui le seignor le