IN USE: no
[TOP MARGINAL NOTE: n~]
A
Quant il dort si est apoies
A .i. arbre et droit en estant
Li veneor quil vont chacant
Les arbres a coi il sapoient
Les trancent par de sos et soient
Si ca terre ne chient pas
Et cil qui ne set pas le quas
Quant il sapoie si chiet jus
A la terre tos estendus
Ne ne sepuet sus relever
Iluec li covient demorer
Lors baaille* gemist et plore [scribal error : bataille]
Tant calcune fois vient desore
Altre clifant por lui aidier
Et quant nel puent redrecier
Si gemissent et font dolor
Et li petit qui vont encor
muchent par desos et sos lievent
Tant calcune fois se relievent
Ensi sont escape de mort
Ascune* fois par tel esfort [scribal error : alcune]
Mais quant nespuent relever
Si lor covient laissier citer
Et sen vont gemissant ades
Et cil qui reponu sont pres
Les prendent par lor estrumens
En si prent on les olifans
El flun dynde ca a non ganges
Sont les anguilles as grant ranges
Qui bien ont .CCC. pies de loig
Si les mangue on al besoig
Mainte altre beste merveilleuse
den ynde orible et hisdeuse
Dragons serpens et altres bestes
Qui ceveus ont en cols entestes
Iluec li basilicoc sont
Qui si venimeus regart ont
Qui du regart deus seulement
Ocient il oisieaus et gent
Teste ont de coc cors de serpent
Nule beste a li ne se prent
Rois est sor tos altres serpens
Com sor beste lions poissans
Siest blans roies cha et la
La terre par ou il senva
Navra jamais erbe ne fruit
Nis harbre en perissent tuit
Se mors a beste ou altre cose
Jamais beste aprocher ne lose
Sira en tele region
B
Serpens a cornes de moton
Altre beste ca non aspis
Qui ne puet estre anulior pis
nen cantes separ dous cant non
Dont il ot volentiers le son
Mais quant le cant premier escoute
Sacoe en soreille boute
Qui ne loie et se trait ensus
Por ce que ne soit de cheus
Altres ia cont non tygris
Con prant a alcunes fois vis
Cest ca dont on tiac le fait
Altre venin oste et des fait
Une maniere ia de vers [scribal addition at end of line : n~]
A .ij. bras si lons et divers
Qui les olifans en abatent
Et tuent quant sor aus senbatent
Li serpens vit moult longement
Et quant viels et foibles se sent
Si se confont par geuner
Et se laisse si afamer
Qui poi li remaint de sori cors ?
Puis se met par .j. pertuis fors
Daucune piere moult estroit
Et se met outre a tel destroit
Qui la pieaus i demore entiere
puis i vient altre pieaus ariere
En si reforme son e age
comme beste et moult est sage
Serpens ia dautre maniere
Qui mainte preciouse piere
En restes et en lor eus ont
Qui mainte vertus en aus ont
des pieres dynde
An ynde croist li dymans
Une piere de vertus grans
Ca lui trait le fer et ravist
par la vertu que en lui gist
La croist li daymans entiers
Qui ne puet estre de pecies
Nuses separ sanc de boc non
Sia altres de grant renon
Esmeraude qui la veue
Con forte quant on li met nue
Les carboncles i est ardans
par nuit comme carbons ardans
Si a saphyrs qui en fleure
Ostent et duels et enflamure
Topaces qui ont color dor
Et rubins qui mieus vaut encor
C
Sira autres pieres asez
Qui en eles ont grant bontes
Mais qui savoir en veut la faire
Si aille lire lapidaire
Qui dist lor nons et lor vertus
Car ci nen dirons nous orplus
des contrees dynde
Den* ynde a maintes grans contrees [scribal error : e covered by D?]
De gent et de bestes pueplees
Une en ia perse est ses nons
Et tient .xxxiij. regions
Dont lune persie est nomee
Ou premerain si fu trovee
Un erbe kingremance a non
Ca ne on fait estre en prison
La croist une pois sest si caude
Qui la main du tenant escaude
Et quant la lune vait croissant
Et en son decors de croissant
De cele poit saident bien
Cil qui sont nigromarien
Apres est mesopotanie
Ou niniven est establie
Une cite de renomee
Qui de lonc a .iij. jors dalee
Une tor a en babiloine
Qui fu faite de grant essoine
Dont li murs sont et fort et bel
Et lapele on le tor babel
Qui de haut a tot environ
.iii. mile pas jusques enson
En la region de caldee
Fu astrenomie trovee
En cele est la terre de sable
Puis est trace puis est arable
De ces .iij. furent li .iij. roi
Segneur qui le soverain roi
Ihesu crist qui fu nes en terre
A lerent comme deu requerre
La croist li mire et li encens
Et si a maint pueple de gens
Si est asise grant provence
Et la region de soience
Qui prant du soleil non finis
Un oisel a en tel pais
Par non est finius apeler
Nest cun seul en tous les regnes
Quant muert si renest ses oiseaus
Grans est de cors et gens et beaus
Alcief a une creste enson
D
A la maniere dou paon
Pis et Gorge li resplendist
Et en color dor si rogist
Comme rose par de sor dos
Et vers lacoe est issiblos
Com est li ciels quant il est purs
Et quant daage est bien meurs
Lors va en .i. mont haut et bel
La ou renovele sapel
Sor cel mont cort une fontaine
Moult grant et large et clere et saine
Et a .i. moult grant arbre desus
Qui on de loig voit moult ensus
La fait son repaire et son ni
De sor cel arbre tot en mi
Despices de si grans valors
Com ne porroit trover meillors
Puis sadrece de deus son ni
Quant il la fait et por furni
Si muet ses eles et debat
Vers le soleil tant quil sen bat
Ou cors une si grant calor
Qui esprant et art tot entor
Tant que tous ars et brusles est
Et lors uns autres si renest
Puis que li autres est brusles
Ensi nest cun en tous regnes
Or vous redirons dautre cose
Sicom ia le truis a englose
Puis vient damas et anthioce
Ou il a maint castel sor roche
Plative et puis salmarie
Sebaste et puis pantapolie
Y sodome et gomore i furent
.ij. cites que perrillier * durent [scribal error : perillier]
I cele part est la mer morte
Qui riens nule en li ne porte
Ismaelite une contree
I est ensi quest habitee
De .xij. manieres de gens
Puis si vient egipte la grans
U nue ne pluie ne vient
Qui xxiiij. poples tient
Si a une grant region
Ou il ne repaire nus hon
Fors femes fieres com lion
Qui est devers septemtrion
Qui vers les homes se combatent
En canp les ruent et abatent
Armees comme chevalier
EN