BnF. Département des Manuscrits. Français 14964

[Upper margin, later hand, Anno Domini MCCLXV.] [initial: At line 1, a two-line initial /L/ with red, blue and yellow penwork decoration with elaborated extension into the margin]

[Lower margin, later hand, Suppl, fr. 660]

li .xii. quele la reondesce de la terre est li .xiii. por quoi diex fist le mont reont li .xiiii. dele isnelete dou cours dou firmament, et des .vii. planetes Ci commence la seconde partie la seconde partie si contient .xix. capitles par parties, et .ix. figures li premiers capitles est comment la terre est devisee en diverses parties, et en la quele partie ele est habitee li secons est de la mappemonde et ou ele commence, si est dayse la grant, de paradis terrestre ou il siet, dynde, de la diversete des gens, et des bestes, des pierres, des contrees dayse la menor, des gens, des poissons, et des arbres qui isont li .iii. est deurope et des regions qui isont li .iiii. est daufrique et des contrees qui isont li quins des isles, et de lor choses li .vi. des choses deurope et daufrique de la maniere des bestes, et des oisiaus qui isont, li .vii. daucunes choses communes, li .viii. ou siet enfers et quels chose enfers est li nuevismes pour quoi laigue keurt par la terre, li disismes por quoi aigue douche, et salee, noire et chaude et envenimee sourt en terre li .xi. ou la mappemonde fenist et si est ausi de diverses fontaines

li .xii. comment la terre crosle et fent li .xiii. comment la mers devent salee li .xiiii. de lair et de sa nature li .xv. comment, noif, et plueve, gelee, et nues, gresiels, tempestes, esclistre, tonnoile avienent li sesismes comment li vent noissent li .xvii. dou feu, et des estoiles, qui samble que eles keurent et chieent et dou dragon que ce est li .xviii. dou pur air et comment li vii. planete isont assis ordeneement li .xix. des estoiles et dela concordance de tout le firmament Ci commence la tierce partie la tierce partie contient .xxii. capitles et .ix. figures, li premiers capitles est comment il est jors, et nuis, et por quoi on ne voit les estoiles de jors, et le solail denuit, li secons comment la lune recoit diversement lumiere li .iii. comment li eclypses dela lune avient li .iiii. des eclypse dou solail li .v. de leclypse, qui avint alamort ihesu crist. li .vi. dela vertu dou ciel et des estoiles. li .vei.*, comment on mesura le monde, et por quoi li .viii. dou roi tholomeu, et des autres philosphes. li .ix. comment on sauva clergie.

[* scribal error for vii]

por le deluge Li disismes comment on retrova clergie apres le deluge Li unsismes des merveiles que virgiles fist par astronomie Li .xii. comment et por quoi monnoie fu establie Li .xiii. des philosophes qui cerchierent le monde por aprendre Li .xiiii. de philosophie, et de la response platon. Li .xv. combine la terrre a delonc environ, et combien despes parmi Li .xvi. combien la lune et li solaus contient de grant, et de haut, cascuns endroit soi Li .xvii. de la grandor et de la hautesce des estoiles. li .xviii. de la grandor dou firmament, et dou ciel qui est desus Li .xix. dou nombre des estoiles et delor ymages. li .xx. dou ciel cristallin, et dou ciel empire. li .xxi. dou celestre paradis, et de son estre Li .xxii. si est li recors ou la recapitulations de ces choses li prologues Qui bien vielt entendre cest livre Et savoir comment il doit vivre Et aprendre tele clergie Dont miex vivra toute sa vie Si lise tout premierement Et apres ordeneement Si quil ne lise riens avant Sil nentent ce qui est devant Ensi porra le livre aprendre

[initial: 22nd row, opening initial /Q/, 2 lines, in blue with red pen flourishing]

Quautrement nel puet nus entendre Ci commence la mappemonde estraite de latin en francois Qui vieut entendre aces commans Si puet aprendre en cest roumans Grant partie dela faiture Dou monde comment par nature Fu fais de dieu et acomplis Et por quoi il fu establis Dont il nous fist si grant bonte Que ja riens neussions este Dont fussiemes ausi perdu Comme ce qui onques ne fu Si proions au commencement A dieu le roi omnipotent Quen cest livre nous doinst entendre Tel bien et tel science aprendre Qui nous conduist et nous ramaint A son paradis ou il maint Et nous doinst sa grace et samor Que conquerre empuissons lounor Si dirons tout au premerain Dou glorieus dieu souverain De la poissance dieu Quant diex fist lemonde premier Il ne li estoit par mestier Quautant eust devant com apres Diex fu devant et iert ades Il ne sen amenda deriens Onques ne li failli nus biens Il not onques ne soif ne faim

[initial: 3rd row, opening initial /Q/, 2 lines, in red with blue pen flourishing]

[initial: 24th row, opening initial /Q/, 2 lines, in blue with red pen flourishing]