68r

De cest air prennent lor habit
Et cors, et maligne esperit
Cest anemis, qui tout mal ose
En samblance, daucune chose
Et quant il se puet aparoir
En aucun lieu, por decevoir
Ou por faire, issir de son sens
Dont aucune fois est poissans
Ou quant par art, de ningremance
Se met en aucune samblance
En tel figure com il vient
Car tant enfait, com len eschient
Mais cest une ars, qui lamort donne
Celui quau maufe sabandonne
Car il nen set mot si est mors
Et dampnes en ame et encors
Mais or devons de ce enquerre
Que en lair avient de la terre
Comment nues, pluies, gelees, nois, tempestes,
tonnoires, et esclistres, avienent li .xv. capitles
Des nues vous dirons ici
Que cest, et de la plueve ausi
Li solaus si est fondemens
De toutes chalours et de tans
Tout ausi com li cuers de lomme
Fondemens est ce est la somme
De la chalor quen home habonde
Est li solaus li cuers dou monde
Et fondemens, par sa valor
De toute naturel chalor

[initial: 21st row, opening initial /D/, 2 lines, in red with blue pen flourishing]

[line 10 on this folio has an "+" in its left margin]