68v

Par lui vit quan quen terre naist
Ensi com, a damedieu plaist
Si com vous orres ci apres
Se cest livre ci tenes pres
Les nues fait, en haut monter
Puis en fait, la plueve avaler
Par force, or entendes comment
Quant li solaus ses rais estent
Sor terre, sor mer, esmares
Ou il gete par tout ses rais
Si le desesche, et si entrait
La moistor, qui amont sen vait
Mais cest une soustiex moistor
Peu pert, et si a grant vapor
Et monte dus quen lair emmi
Ensi semble, et remaint ici
Et peut et peu, tant en ivient
Quoscure, et espesse devient
Tant quele nous tant la veue
Dou solail et tels chose est nue
Mais na pas si grant obscurte
Que dou jor nous toille clarte
Et quant trop espesse devient
Sen naist aigue qua terre envient
Et la nue blanche demeure
Lors li solaus qui est deseure
Luist parmi sadonc nest trop noire
Ausi comme parmi, un voirre
Si com une chandoile esprise
Qui dedens la lanterne est mise