BnF. Département des Manuscrits. Français 14964

Dame diex no peres hautain Tans, ne mois, ans ne jors ne eure Tout ades entous biens demeure A lui ne tost netart nafiert Quamconques fu ne quamquil iert Tout ensi le monde veoit Ains quil fust fais com orendroit Se nul monde fait eust onques Autretant vausist il adonques Com il puet jamais valoir miex Quautrement ne fust il pas diex Se tout ne veist et seust Quanque jamais estre deust Car ensi fust il defaillans Daucunes riens et nompuissans Et detant fust il hom morteus Mais sa [nature nest] pas teus Car il est diex entierement Sans fin, et sans commencement Riens ne li est vies ne nouvele Tous jors li est fresche et nouvele Tout li bien sont sien par droiture Et alui sen vont par nature Car delui muevent tout et vienent Et alui lor droit chemin tienent Si est devant ses iex ades Ausi bien li loins com li pres Il naura ja de nul mal cure Car sa bontes est toute pure Toute nette, sainstisme, et sainne

Sans mal, sans riens de male vainne Car li mal li sont acontraire Por ce les convient ensus traire De lui et detrestous ses biens Car ce nest fors ordure et fiens Sel convient descendre emparfont Et lebien demourer amont Devant dieu, qui est clers et purs Li maus qui est lais et obscurs Et tenebreus, sor toute rien Descent aval et lait le bien Car ce convient il par nature Ensi com on voit de lordure Dun vin qui est mis ou vaisseil Qui laiens se depart dou bel Si quen haut demeure li bons Et la lie se trait au fons Qui malvaise est et riens ne vaut Et li bons qui [de]meure en haut Devient tous jors et clers et nes Et li mauvais obscurs et lais Tant com li bons plus clers devient De tant plus la lie retient Dordure, et de maleurte Et ades a plus doscurte Ensi est dou bien et dou mal Le mal convient descendre aval En lieu tenebreus et orrible Et de toute dolour penible Et le bien convient estre amont

Devant dieu ou tout li bien sont Et com li biens plus ses clarcist Devant dieu plus sen esjoist Tant [a?]li maus plus doscurte Et de dolour et de vilte En enfer ou il iert tous dis Tant com diex iert em paradis Ou diex a tous biens devant lui Et ades avra sans anui Tous les a tous, les enlumine Sans defaute sans nul termine Diex puet tout faire et redeffaire Sans rien muer de son afaire Car il puet tout quanque il vient Nule riens alui ne saquient Establement sans mouvement Delui muevenent tout movement Dune seule eure de cest mont A tous ciax quen paradis sont Dont li mendres qui la demeure A plus de biens dedens une eure Joie, honor, deduit, et solas Dont il ne sera jamais las Que nus hora penser ne porroit En .c. mile ans se il duroit Li plus soutiex qui onques fust Sil pensast au miex quil peust De cele joie est diex tous sires Comme diex que vauroit li dires Car tout set quanque fu et iert

Et tout a quamqualui afiert Onques nus biens ne li failli Ades les a tous devant li Ains biens ne fu ne ja niert fais Qui devant dieu ne soit pourtrais Ancois que lemonde fesist Or oies por quoi il le fist Por quoi diex fist le monde, li .ii. capitles D iex fist lemonde ason voloir Por ce quil i peust avoir Aucune riens qui bone fust Qui ses biens deservir peust Se donc ne perissoit enli Et por ce le monde establi Nom pas por ce qui miex lenfust Ne que nul besoig en eust Mais il le fist par carite Et par grant debounairete Quil vaut comme bons quatre riens Partist alui et ases biens Et que toute autre creature Chascune selonc sa nature De sa poissance, si tenist Tant com alui apartenist Ensi vaut le monde establir Que tel chose empeust issir Qui peust entendre et veoir La noblesce de son pooir De sa poissance, et de son bien Quil fist por homme terrien

[initial: 9th row, opening initial /D/, 2 lines, in red with blue pen flourishing]

Et quensi le peust servir Qua tous jors peust deservir Les biens quil avoit fais por lui Si devons molt amer celui Qui nous fist et bon gre savoir Quant il nous dona tel pooir Que se nous amer le volons De tous ses biens signor serons Or lamons si ferons que saige Ou nous i arons grant damage Se nous perdiemes tous tes biens Ja pour ce diex ni perdroit riens Por nous les fist si les aions Puis que deservir les savons Por quoi diex forma homme a sa samblance Diex forma home a sa samblance Por ce quil eust ramembrance De ses biens, si quil ^lefen eust Et que deservir les peust Tout par droit vers son creatour Dont il li fist si grant honor Que sor toute autre creature Le fist samblant a sa figure Et li donna natureument Le plus gentil entendement De lui amer por olui estre Car nule riens qui peust estre Por ce quil peust a ses biens Partir plus que nule autre riens Nonques diex ne fist por autrui

[initial: 16th row, opening initial /D/, 2 lines, in blue with red pen flourishing]