BnF. Département des Manuscrits. Français 14964

ReadAboutContentsHelp
GAUTIER DE METZ, Image du monde.

Pages

6r
Indexed

6r

Tant de biens com il fist por lui Mais que il deservir les vuelle Se ce non, drois est quil sen duelle Ne fait adieu tant de bonte Qui fait bien por avoir son gre Car son preu fait plus que lautrui Et tout li bien sen vont par lui Pour ce le feroit bon amer Car molt se puet chaitif clamer Qui par sa folie desert Qui cele haute gloire pert Por pechie qua riens ne li monte Et en la fin ne na fors honte Qua pres lui entel lieu le tire Ou il na fors duel et martire Dont ja ne se verra delivre Por si peu com il a avivre Ensi la joie a cil perdue Qui li deust estre rendue Se ses pechies ne li tausist Et fires enfust se il vausist Se tant plus se fust maintenus Ou bien faire et de mal tenus Car qui bien fait tant a dounor Que li angle en font lor signor Devand dieu, et roi courone Si se puet tenir a bon ne Qui tant fait com il vit en terre Qui puisse sele honor conquuerre Por son preu et faire le puet

Last edit about 3 years ago by EHebb
6v
Indexed

6v

Chascuns hom tot par soi sil veut Bien le puet gaaignier ou perdre Au queil quil vient se puet a erdre Por quoi diex ne fist homme tel quil ne peust pechier Damediex douna le pooir Lomme de faire son voloir Bien ou mal le quel qui li plaist Car sil eust home tel fait Quil ne peust faire fors bien Il li tausist aucune rien De son pooir, car ne peust Faire mal quant il li pleust Et ensi vausist il on non Feist il bien et sans raison Car ce ne fust mie par lui Quil fesist bien mais par autrui Qui len eust entalente A force et donne volente Et cil par cui il le fesist Le guerredon en deservist Non pas il, car petit desert Qui par force dautrui messert Qui me metroit pour faire bien Demain emprison maugre mien Je nel tenroie mie a saige Car il me feroit grant outrage Bien leust diex fait sil vausist Mais ja tans biens ne deservist Com il fait ore denul tans Et por ce fist diex teus les gens

[initial: 5th row, opening initial /D/, 2 lines, in red with blue pen flourishing]

Last edit about 3 years ago by EHebb
7r
Indexed

7r

Que plus de bien avoir peussent Ja tant autrement nen eussent Se diex a fait ses angles teus Quil ne puissent pechier morteus Ne mal faire, ja si haut don Ne deserviront com li hom Mais qui vauroit bien deservir Si doit dieu volentiers servir De cuer, de livre, par amor por conquerre plus haute honor Si vaut diex que li hom tels fust Que par droit deservir peust Autant de bien enson endroit Com il meismes en avoit Et li donna sens, et raison Davoir vers lin entention Car par droit servir le devoit Si est fals qui ne se porvoit De bien faire, car tout li bien Que cascuns fera, seront sien Si en ara, por un bien cent Et por un mal .c. mals autant Cil est fals qui cuide de rien Bonte faire adieu de son bien Et quant de mal faire, se tient Fors tant que diex plus chier len tient Car se tous li mons se perdoit Ja por ce diex mains nen volroit Ne biens quil ait, empoeste Se tout li saint, qui ont este

Last edit about 3 years ago by EHebb
7v
Indexed

7v

Au monde et qui mais iseront Neussent fait nul bien ou mont Et dampne se fussent trestuit Ja por ce diex mains de deduit Nen eust ne nen vausist pis Ne riens qui fust em paradis Mais li saint furent sage et preu Et bien sorent faire lor preu Com cil qui apercurent bien Que li siecles ne valoit rien Si orent plus chier mal soufrir Et lor cors a martyre offrir Por dieu, a honte et a laidure En cest siecle qui si peu dure Por avoir les biens atous dis Et la joie de paradis Que avoir laise aucors muable Por estre en painne pardurable Si neurent cure de tels biens Qui en la fin, ne fust fors fiens Ains prisent si le fraim asdens Quen paradis sont tout dedens. Mais on cuidoit au mont tels fols Qui eurent bien carchies lor cols De ce dont il sont descharchie Quen paradis , sont herbergie Encor tient on maint sage a feu Qui sa paraille de son preu Maint saint sont ore emparadis Que sil prisassent les faus dis

Last edit about 3 years ago by EHebb
8r
Indexed

8r

Des gens tant com au monde furent Neussent pas fait ce quil durent Le plus perdissent, por le mains Ausi com font orendroit mains Qui tant covoitent avoir los Que por les paroles des fols Laissent affaire les biens dieu Dont li saint firent miex lor preu Ne laissierent pas por delis Dieu aservir por paradis Ou il ont joie et toute honor Com cil qui tout ensont signor Et sautrement leussent fait A des eussent honte et lait En enfer outous maus habonde Si est grant merveille dou monde Comment cest que plus de gent sont Qui plus de painne souferront Por le los des gens aquester Ou por avoir, a amasser Qui si peu de tans lor demeure Et si lor faut, en .i. peu deure Que por conquerre ne feroient Les biens dieu qui ja ne fauroient Que li saint ont en lor baillie Por un petit de dure vie Qui ne samble fors que delis A cials qui decuer si sont mis Et en la fin lor est avis Que por noient ont paradis

Last edit about 3 years ago by EHebb
Displaying pages 11 - 15 of 234 in total