BnF. Département des Manuscrits. Français 14964

Ausi le peut avoir chascuns Et des biens dieu estre communs Et avoir la joie saintisme Sil ne defaut en lui meisme Mais cil qui la joie desirrent De cest mont itant sen empirent Que nul bien ni pueent aprendre Ne alor sauvement entendre Si ont plus chier laise dou cors Dont il sont mis plus tost dehors Et mene a toutes dolours Que laise de lame atous jors Ne ne prisent bien ne savoir Domme, sil ne se set avoir Au siecle, et na avoir assez Par quoi soit au siecle alevez Ains dient quil est faus et nices Por ce quil ne fait lor malices Mais tout cil de dieu sont maldit Par la bouche dou roi david Qui au monde, se painnent plaire Por nule riens quil sache faire Car cis orguiels, est chose vainne Por quoi lame, nest mie sainne Dont david dist en son sautier De quoi on sert dieu au moustier Maudit sont, dist il trestout cil Et confus, comme gens dessil Qui au monde, plaisent de riens Car eslongie sont de tous biens

[lower margin, quire number: [.i].^us]

Et de dieu sostent et descordent Puis quil sont tel quil si acordent Car diex les a tous endespit Et sa grace lor escondit Por ce quau monde quierent los Ou il fu tenus comme sos Et puis dist diex en leuvangile Qui ne parole pas de guile Que cil bon eure seront Qui le monde endespit aront Et qui des gens seront hai Et desachie et envai Com fol por lamor demon non Car ou ciel aront guerredon Ce pueent veoir plainnement Que se diex meismes ne ment Et verites faussee nest Que tout cil cui li mondes plaist Et qui le los dou monde acuellent Ne puet estre quil ne sen duelle Cil est faus quavoir enquiert point Car tout cil sont en malvais point Qui point enquierent ne porchacent Car diauble en enfer les chacent Qui lor font dolereus conroi Ja ni avra si cointe roi Ne duc, ne conte, ne poissant Dont li diables ne face autant Com dou plus vil quen enfer viegne Sil fait tant qua ses craus le tiegne

Vil et ribaut tout endevienent Et roi et prince qui la vienent Molt se puet plaindre de ses maus Qui ci est rois et la ribaus Quant en paradis puet conquerre Plus noble roiaume quen terrre Car qui dieu sert tant com est vis Il en est rois emparadis Plus que li roi ne furent onques Au mont or le deservons donques Et si laissons lemal atant Puis que oi aves ci devant Por quoi diex fist le monde et lomme Si vous dirons apres la forme Dou monde selonc sa facon Comment il est fais en viron Mais raisons est que nous dions Des .vii. ars et de lor raisons Comment eles trouvees furent Par ciaus qui de bien sapercurent Car par eles set on les fais Dou monde comment il est fais Si endevons parler avant Por miex entendre ades avant Comment et por quoi les .vii. furent trovees li .v. capitles OR dist cis livres en partie Qui est estrais dastronomie Comment li saige ca arriere Vaurent enquerre la maniere Dou monde comment fais estoit

[initial: 26th row, opening initial /O/, 2 lines, in blue with red pen flourishing]

Dont chascuns molt sesmervilloit Com li mondes fu compares Et il i ot des gens asses Si regarderent li pluisor Le firmament qui tout entor Sesmovoit molt sesmervillierent Comment cestoit si envillierent Par maintes nuis, et par jor cler Lors prenoient a regarder Les estoiles si les veoient Vers orient et se movoient En viron par desor lor testes Ne pensoient pas comme bestes Qui ne quierent fors lor pasture Si com or font cil qui nont cure Fors devivre comme porcel Et de aaise couchier lor pel Ains villierent par maintes nuis Si ne lor estoit pas anuis Quil veoient le firmament Ainsi movoir si noblement Les estoiles movoir veoient Dus quatant queles se couchoient Contre orient par dautre part Lune tost, et lautre plus tart Ensi regarderent entour Le firmament desci au jor Quil reveoient le solail Au main lever cler et vermeil Qui lamoitie dou jor montait

Et lautre moitie descendoit Tant quil saprochoit de couchier Qui la nuit faisoit aprochier Et lors reveoient la nuit Les estoiles et lor conduit Tant que li solaus revenoit Qui tout le jor en luminoit Et sen aloit ledroit chemin Tant quil repairoit au matin Si regarderent de la lune Qui diversement estoit une Selonc ce quele apert au monde Et lune fois estoit reonde Et alautre aparoit demie Ausi comme parmi trenchie Apres cornue devenoit Ensi defaillant sen aloit Tant que nestoit pas plus veue Apres aparissoit cornue Puis demie, puis toute plainne Si com devant et ausi sainne Puis sorent bien par lor esteil Que le saprochoit dou soleil Dus quatant quen droit lui estoit Et puis des lor sen departoit Et apres sen eslongoit plus Tant quele estoit ausi ensus Si com ele avoit fait devant Et lors sen aloit aprochant Puis sen partoit puis sen venoit