BnF. Département des Manuscrits. Français 14964

Si sen aloient com hermite Li autre le lor departoient Et li pluisor sen de partoient Si com miex lor estoit avis Et mains i pensassent tous dis Ne nen retenoient sans plus Fors tant seulement qua lor us Et voloient bien retenir Aucunes gens por aus servir Sique nes convenist entendre A riens nule fors qua la prendre Lors si faisoient lors maisons Ausi com en religions Ensus des gens et se metoient En tels liex que entriax venoient La semainne .ii. fois ou quatre Por aus solacier et esbatre Et rendoit chascuns sa raison Selonc la soie entencion Tant quil avoient esprouve Ce que chascuns avoit trouve Et faisoient de celui maistre Qui plus connoissoit delor estre Et qui estoit de plus grant sens Si les lisoient par consens Et cil recordoit lor raisons Apres oiant les compaignons Et ensamble lor recordoit Sique chascuns li acordoit Lors metoit chascuns en escrit

Ce que li maistres avoit dit Ensi fu primes trouve clergies Comme trouvees et avancies Et penserent tant com miex peurent Tant que depar damedieu seurent De cui toute science naist Grant partie de ce quen est Mais ce nefu mie embrief tans Ancois imisent molt grant tans Car cil qui premerain estoient Tout ce quen lor tans entendoient Sienfaisoient les escris Si com miex lor estoit avis Por ce que cil qua pres venissent Qui entremettre sen vausissent Tenissent lor escris ades Et lesissent tous jors apres Et ensi cil apres apres lefirent Tout ce que trouverent et virent Misent tout en compilisons Et concorderent lor raisons Tant firent chascuns alor tans Quil mirent plus de .ij. mile ans Ancois quil eussent aquises Les .vij. ars et ensamble mises Mais bien tinrent a emploie Ce quil i eurent travillie Car il savoient par lor sens Quan quil avenoit alor tans En terre, par sens de nature

Quant mettre ivoloient lor cure Si ne ses mervilloient pas Quant il avenoit aucun cas Mervilleus en ciel ou en terre Car il ensavoient enquerre La raison por quoi ce estoit Puis que par nature avenoit Et si en amoient dieu plus Quant il veoient teus vertus Dont il veillierent mainte nuit Si en eurent molt grant deduit Quant si haute chose trouverent Dont envers dieu tant samenderent Quil connoissoient verite Et laissoient la vanite De cest siecle qui si peu vaut Por avoir joie qui ne faut Dont maint qui philosophe furent A tort, et sans forfait morurent Por droiture quil anoncoient As grans signors et lor blasmoient Lor malvaiste et lor ordure Et lor preechoient droiture Et cil qui croire nes voloient Et qui honte avoir icui doient De ce que si les blasmoit on Les faisoient mettre emprison Ou il les faisoient ocirre Dont cil soufroient le martire Por droiture et por verite

Dont il erent a herite Si com li saint qui mort soufroient Por la loi quessaucier voloient Si ot de teus qui par lor sens Prophetiserent le saint tans De la venue jhesu crist Si comme Virgiles qui dist Qui fu au tans sesar de romme Dont maint devinrent plus preudomme Dist cune novele lignie Sestoit de haut ciel eslaissie Qui en terre feroit vertus Dont diables seroit vencus Dont Sains pols qui vit ses escris Qui molt proisa lui et ses dis Dist de lui acuer irascu Hai queil je teusse rendu A dieu se teusses tenu Tant que je fusse atoi venu Autres philosophes i ot Dont chascuns dist aucun bon mot Mais ne poons or pas ci lire Tous les biens que on porroit dire Preudomme furent et vaillant Grant clergie mirent avant Car se por clergie ne fust Ja ne seust on qui diex fust Et sil ne fussent si preudomme Jamais ni eust si grant somme De clergie com il a ore

Si ipensast on bien encore Trouver, apres sil fussent tel On itrouvast et un et el Com il firent premierement Mais clergie vait anient Si qua peu que ne perist toute Par quoi les gens ne voient goute Car cil qui deussent entendre Au bien et les autres aprendre Et donner example de bien Ce sont cil qui mains font debien Et se par lor folie avient Que nus clers clergie retient Par son sens ne par son savoir Dont il puisse a quester avoir Et quant il a avoir asses Si vaut pis que devant asses Car avoirs si souspris les a Ne pueent entendre fors la Mais poure ja qui aprendroient Volentiers se pooir avoient Ni pueent pas ensi entendre Por lor vivres, ou nont ou prendre Ne nont de quoi avoir nul livre Ains lor convient querre lor vivre Car li riche ont si tout saisi Que li povre en sont des saisi Si a mains clers qui riche sont Qui les grans mons delivres ont Duns et dautres mout aornes