BnF. Département des Manuscrits. Français 14964

Por ce quon les tiegne asenes Et as bons clers que plus nenquierent Mais que le los des gens aquierent Et ensi prennent lor estos Et font ausi comme li cos Qui saviande porchacoit Ou fumier, ou grater aloit Tant quil trouva la riche gemme Qui de clarte getoit grant flame Lors la commence a regarder Et puis tantost la laist ester Car de gemme cure navoit Mais de viande, quil queroit Ensi est demains convoiteus Qui ont les livres precieus Et aournes, et bien et bel Mais nen regardent fors lapel Por ce cun peu lor samble biax Tant com li livres est nouviax Si regardent aucune fois Por la biaute .ij. fois ou trois Ne plus nen font que lor regart Tantost se tornent dautre part Si pensent del ventres emplir Et lor faus desirs acomplir Et sil ivoloient entendre Il porroient grant bien aprendre Car le pooir bien en avroient Et autretel faire porroient Com cil firent ca en arriere

[line 4 on this folio has an "+" in its right margin]

Qui par lor sens et lor maniere Les troverent premierement Mais il ont fol entendement Et por ce perissent les ars Si qua painnes seit on les pars Dou premier livre de gramaire Qui des ars est premiere et maire Ains boutent les ars en lor males Si oient lois et decretales Tantost ou il devienent mire Por avoir, ou maufes se mire Nencor nel font pas porsavoir Tant com por gaaignier avoir Une coustume a aparis Que maint clerc vuelent avoir pris Destre maistre et avoir renon Ne plus enquierent que lenon Si ont plus chier lenon demaistre Por lor avoir que bon clerc estre Sans avoir lenon de maistrie Sique vanites les maistrie Mais atort sont maistre clame Car peu sevent deverite Tantost com il ont non demaistre Si laissent de clergie lestre Et se prennent au gaaignier Com marcheant ou courretier Ensi ont au siecle lenon Maint qui peu sevent de raison Nest orendroit pas selonc droit

[lower margin, quire number: .[ij].^us]

De ce dont cil font aloer Qui travillierent as premiers Dont il nous est molt grans mestiers De ce que retenu avons Ice peu que nous en savons Car se clergie fust perdue Ja riens de dieu ne fust seue Ne jamais les gens ne seussent Queus choses miex faire deussent Si fust tous li mondes dampnes Et mar fust onques li hom nes Car riens ne fust par lui seue Ne que par une beste mue Et tous li biens qui est seus Est des .vij. ars tous esmeus Que cil troverent par lor sens Car par ce eurent il porpens De dieu amer, et sa vertu Et que diex est, et ades fu Si le creirent plus de foi Si que en lancienne loi Mais or perissent les clergies Par nos maus, et par nos envies Ensi que petit retenu En ont li grant et li menu Car nus ni ose entendre mais Por mesdisans, riches malvais Qui nul bien ne veulent aprendre Quant il voient aucun entendre A clergie, dont il peussent

Riche estre et dont aaise fussent Tantost les en vuelent geter Mais ensi les vieut cil lever Qui est lor maistres et sest lor sires Et acui plaist tant lor mesdires Quil lor fera si mal eur Que de tout mal seront seur En enfer le puant abysme La mesdiront il diaus meisme Et diront que mal onques furent Quant il naprirent ce quil durent Et laisseront bien ciaus ester Qui plus amerent conquester Clergie, que le fol savoir Dont il assamblerent lavoir Ensi sera nest mie fable Tout cil qui por avoir muable Laissent riens de bien aaprendre Sont asseur de mal atendre Car par lor avoir faut clergie Et apeu quele nest perie Et ce qui ore seu en est De la cite de paris naist Plus que de nule autre cite Cele en a la nobilite Des .iii. manieres de gens, et comment clergie vint en france .li. vi. capitles Clergie regne ore aparis Ensi com ele fu jadis A athenes qui siet en gresce Une citei de grant noblesce

[initial: 27th row, opening initial /C/, 2 lines, in blue with red pen flourishing]

Et philosophe qui lors furent Qui les autres ensengnier durent Ne poserent se lonc lor sens Fors que .iij. manieres de gens Clers, chevaliers, ovriers de terrre Li gaaignor doivent conquerre As autres .ij. lor estavoir De ce quil lor convient avoir Por vivre au mont honestement Et chevalier comme sergant Les doivent garder et deffendre De lun envers lautre mesprendre Clerc doivent ces .ij. ensengnier Et de lor oevres adrecier Si quaucune chose ne facent Dont il pergent dieu et sa grace Ensi penserent .iii. manieres De gens li saige ca arriere Com cil seurent comme sage Cuns hom ne porroit son corage Mettre, a ce quil puist estre adroit En .ij. manieres ou en trois Car onques navint jor de vie Que clergie et chevalerie Neussent lor vivre a delivre Sor les gaaignors por aus vivre Ne gaaignor avvec clergie Ne peurent estre jor de vie Ne ne peurent estre senes Par .i. seul ne estre menes