BnF. Département des Manuscrits. Français 14964

A une des .iij. seulement Convient penser qui droit aprent Ancois que il sachent lor us Et por ce poserent sans plus Trois manieres de gens en terre Li philosophe qui en querre Voloient droite verite Et queroient une cite Au monde, ou miex peussent estre Por manoir et enquerre lestre De clergie por adrecier Aus, et les autres ensengnier Dont athenes fu jadis une Ou il avoient lor commugne Et la regna chevalerie Premierement avec clergie Puis fu aromme translatee Quencor est de grant renomee Et chevalerie irevint Qui tous jors pres de li se tint Et puis est revenue en france Ou chevalerie a poissance Plus quen nul autre lieu dou monde Ensi li uns alautre habonde Chevalerie ensient clergie Partout ou plus est avancie Dont li rois de france puet estre Joiaus et lies quant il puet estre Enson regne tels signorie Com est science de clergie

Ou chascuns puisse sens humains Ne por ce nen remaint pas mains Car cest ausi com la fontainne Tant keurt plus loins et plus est sainne Et tant com li rus keurt plus loing Tant trueve on plus aigue au besoing Tout autresi dire vous puis Que paris est ore li puis Ou on puet plus puisier science Quavoir ipuet la demourance Mais puis cedi quensi clergie Est en france plus avancie Par raison savoir endevroient Li hoir de france sil daignoient Car ausi comme li solaus Des estoiles est li plus biaus Dont tant de biens puet naistre au monde Por le grant bien quen lui habonde Ausi doit li rois miex valoir Des autres gens et plus savoir De clergie, de sapiance Si quil puisse par la vaillance Entre les autres si reluire Quautre gent si puissent conduire Par bien faire vers li atraire Par essample de son bien faire Ensi seroit il rois adroit Em paradis, et ci endroit Si seroit bien, drois et raisons Quil mesissent, entencions

A aprendre tele clergie Quil ne perdissent signourie Apres ceste vie volage Car par nature et par lignage Doivent il tout amer clergie Et aprendre toute lor vie Car charlemainnes molt ama Philosophie, et lavanca En france de tout son pooir Tous les bons clers quil peut avoir Mandoit, et retenoit o lui Mainte painne ot, et maint anui Por crestiente essaucier Nonques por rien ne vaut laissier Quil ne tenist clergie pres Et aprist volentiers ades Et seut asses dastronomie Si com on reconte ensa vie Qui est amee en lohorainne Ou il fu par mainte semainne Car molt ama le lieu et lestre Si voloit par maintes fois estre Encor a il de ses joiaus Es eglises riches et biaus Quil i donna li gentiex hom Car molt ama dieu et son non Et se pena toute la vie Damener en france clergie Encor i est, encor i regne Par la proesce charlemainne

Sen est au roi molt bien cheu Quensi lor en est avenu Car atous jors ont conqueste Sens et clergie en lor cite Sil le beent a retenir Et la vile empais maintenir Car le clergie sen aloit Chevalerie le sieu roit Ensi com ele a fait ades Car tous jors se tient de lui pres Or la retiegne por son preu Car tost porroit perdre son lieu Se clergie sen departoit Car diex len des avanceroit Qui ore len a avancie En terre, et Cor tous essaucie Si sont encore une autre gens Qui sont venu a nostre tans Jacobin, et frere menour Qui se sont mis por dieu amor En religion pour entendre A dieu servir, et por aprendre Dont diex nos afait grant honor Car il retienent or la flour De clergie, pour adrecier Crestiente, et essaucier Par lor travail par lor estude Dont il nont pas pensee vuide De dieu servir, toute lor vie Et daprendre, sens et clergie

Com cil qui le monde ont guerpi Si samble quil ont fait ausi Com cil ca en arriere firent Qui en lor closure se mirent Ensus de gens por miex enquerre Verite, en ciel et en terre Si en a diex fait grant bonte Ciaus qui les ont en lor cite En lor chastiaus, et en lor viles Car il ne servent pas de guiles Ains se painnent de sermouner Por les autres a bien mener Et suefrent sovent grant mesaise Tout por les autres metre a aise Car se ne fust por lor bontes Je cuit bien que crestientes Fust malement ore assaillie De mescreance et mal baillie Si se tienent en lor emprise Com cil qui la cure ont jus mise Dou siecle, sans baer arriere Si en ont molt bonne maniere Car a povrete, se sont mis Por dieu, et por tous ses amis Et maint autre amende ensont Por ce quil voient, que bien font Si endevons, dieu gracier Et nos cuers, a bien adrecier Tant que par droit nous puissons traire Ou saint ciel par nostre bien faire