49r

[Column A]

& si ne sevent quest monnoie
Se p[our] quoi ele fu trouvee
& si gist toute sa pensee
Mes il nont cure dou savoir
Mes q[ue] assez empuissent avoir
& p[our] ce ne lairons no[us] pas
Q[ue]no[us] ne dions aucun cas
P[or] ceulx qui ont talent dapre[n]dre
Sil loient quil veulent e[n]te[n]dre
P[our]coi monoie fu establie
Monnoie si fu establie
P[our] les genz q[ui] navoient mie
Chascuns besz, vin, bestes et dras
Q[ui] ble avoit si navoit pas
Le vin sanz chang[er] lun p[our] lautre
Si changerent li un a lautre
P[our] ce avoir q[ue] pas navoient
C[om] cil q[ue] autrem[en]t ne savoient
Q[ua]nt li philosophe ce virent
Si firent tant quil establirent
P[ar] les g[ra]nz seignors ca arieres
Une riens petite legiere
Dont chascuns ho[m] peust porter
Tant quil empeust achater
Ce q[ue] aillors mestier li seroit
Car chascuns ho[m] pas ne povoit
Porter avec lui tot son vivre
Dont aillors li couvenoit vivre
Si penserent a lor avis
Une chose chiere ne vis
Q[ue] pl[us] q[om]mune p[ar]tout fust

[Column B]

& aucune valor eust
Por pl[us] a droit faire barcaigne
Lun a lautre p[ar] cele ensaigne
Si establirent tel mounoie
Q[ui] fust q[om]mune en toute voie
Teneure petite & reonde
Dargent p[our] aler p[ar] le monde
& fu por ce dite mounoie
Q[ue] les genz movoit p[ar] la voie
Ou damonester q[ue] autant vaut
Ce q[ue] p[our] vivre a lome faut
Monos en grec si vaut autant
Co[m]me une chose solement
Car il nen estoit lors q[ue] une
Q[ue] p[ar] le monde estoit q[uo]mune
Mes or fait chascuns sa monoie
Mellee dont om pl[us] desvoie
Q[ue] selle fust dun seul afaire
Car mainte fause envoit le[n] fere
Se lestablirent pas ainsi
Aillors & en un autre ici
Com cil quil voloient aler
P[our] lestat dou mo[n]de saver
Se li argens estoit fors p[ri]s
Dou tornois ou de pairesis
Si en fust mieudre la monoie
P[our] saver & porter en voie
Car co[m] pl[us] petite seroit
& pl[us] legiere mieuz vaudroit
P[our] ce faire & avoir sa vie
P[our]quoi ele fust establie