3r

[col. 1]

Qui nouz fist et bon grei savoir
Qant il nouz donna tel pooir
Car se nouz ameir le volons
De tous les biens segnor serons
Si lammons ce ferons que sage
Ou nouz iaurons grant demage
Se nous perdiiens touz ses biens
Ja por ce dex ni perdroit riens
Por nouz les fist dex · ses aions
Puis que deserviz les avons ·
Por coi diex forma lomme a sa samblance
Dex forma lomme a sa samblance
Por ce quil est remembrance
De ses biens quil avoir peust
Puis que deservir les peust
Tout par droit vers son creator
Dont il li fist si grant honor
Que seur toute autre creature
Le fist samblant a sa figure
& li dona naturelment
Le plus gentil entendement
De lui amer por od lui estre
Que nule rien qui peust estre
Por ce quil peust a ses biens
Partir plus que nule autre riens
Qonques dex ne fist por autrui
Tant de bien com il fist por lui
Mais que il deservir le voeille
& se non? droiz est quil sendoeille
Ne fait a deu point de bontei
Qui bien fait por avoir son grei
Car son preu fait melx que lautrui
& touz li biens en vienr par lui
Por ce le feroit lon ameir

[col. 2]

Car molt se puet cheitiz clameir
Qui par la folie dessert
Qant cele haute gloire pert
Por pechie qui rien ne li monte
& en la fin nena forz honte
Qapres lui en tel lieu le tire
Ou il na forz duel et martire
Dont ja ne se verra delivre
Por si po com il a a vivre
Ensi la joie a cil perdue
Qui li deust estre rendue
Se ses pechiez ne li tolsist
& sires enfust sil volsist
Se sanz plus se fust maintenus
A bien faire & de mal tenus
Car qui bien fait tant a donor
Que li angle en font lor segnor
Devant deu & roi coronei
Cil se puet tenir a buernei
Qui tant fait qant il vient en terre
Quil puisse tele honor conquerre
Por son preu & faire lestuet
Chascuns· ou tout par soi qui vuet
Bien le puet gaaigner ou perdre
Auquel quil vient se puet a herdre
Parcoi diex ne fist lomme tel quil ne / peust faire / pechie·
Damedex dona le pooir
Lomme de faire son voloir
Bien & mal le quel quil li plait
Car sil eust lomme tel fait
Quil ne peust faire fors bien
Il li tolsist aucune rien
De son pooir · car ne peust
Faire mal qant il li pleust

[Intial, col. 1, lines 11–12: Littera florissa /D/, 2 lines, in red, ornamented with penwork in blue with touches of red, extending into left margin to form 1-sided border in red and blue]

[Intial, col. 2, lines 26–27: Littera florissa /D/, 2 lines, in blue, ornamented with penwork in red with touches of blue, extending into intercolumnar space to form partial border in red and blue]