20r

[col. 1]

Estaindre puiz quele est emprise
Tant que toute est encendre mise
Puiz est danemarche & hongrie
Osterice· & puiz germanie
Qui vers occident a maint raigne
Si est soave & alemaigne
Ou la dinoe une eaue cort
Qen ·vii· flueves se done & cort
Islande· escoce· & engleterre
Toute france·& toute la terre
Qui est· iusqas mons de montgieu
I tant tient europe de lieu
Daufrique ·& de ses contrees
Apres europe rest aufrique
Dont li premiers chiez est alibe
Une terre riche & garnie
& puiz la terre de surie
Jherusalem · & li pais
La ou dex fu & moiz & vis
Grece lombardie & espaigne
Gascongne· pise & toscaigne
Alixandre et maint bon pais
Autre que ie ne vous devis
Si a citeiz & regions
Qui de bestes prennent leur nons
Qui habicent en ce pais
Dont les citez formes ontpris
Dont Romme a forme de lion
Troie de cheual ce dist on
Ethiope rest vers la fin
Daufrique qui ilues prent fin
En ce pais a vnes gens
Plus noirs que poiz ne airemenz
Car il fait si chaut cele part

[col. 2]

Quil samble que la terre art
Dela ethiope na riens
Forz desers & terre sanz biens
Des illes & des regions ·
Puiz que descrite avons la terre
Si devons des illes enquerre
Celes que nouz savons nomer
Dont ilia maintes par mer
Encontre europe est avidos
Une grant ille ·& puiz colcos
Ou la toisons dor fu trovee
Si com laventure est trovee
En cele estoire de jason
Une autre ille qanon aron
De celi fu sains denis neiz
Qui enfrance fu decoleiz
Contre aise en a cinquante quatre
Mais dou conte volrons abatre
Car toutes pas nesnommerons
Une iest· delos est ses nons
Qapres le deluge aparut
Premierement qant il descrut
Une autre ira qanon melot
Por la melodie qon ot
Dou douz chant doiseaus par laiens
Ou pais croist li marbres blans
Si est lille qanon psalmos
Dont sebile fu qui mains mos
Profetiza de ihesucrist
Grant tens devantce quil naquist
A romme· ou ele fu mandee
En cele ille fu controvee
La meniere de pos de terre
Qon fait encor en mainte terre

[Initial, col. 1, lines 13–14: Littera florissa /A/, 2 lines, in red, ornamented with penwork in blue with touches of red, extending into margin to form partial border in red and blue]

[Initial, col. 2, lines 4–5: Littera florissa /P/, 2 lines, in blue, ornamented with penwork in red with touches of blue, extending into intercolumnar space to form partial border in red and blue]