f. 005v - 006

Ausi bien au loing coume pres
Tout ainsi li mondes vet
Ainz quil fust fet comme orendret
Se nul home neust fet onques
Autrement vousist il adonques
Coume il peust valoir mieuz
Quautrement ne fust il pas dex
Se tout ne veist et seust
Si que james estre peust
Car ausi fust il defaillant
Daucune rien et non puissant
Et de tant fust home mortiex
Sa nature nestoit pas tieus
Car il est dex entierement
Sanz fin et sanz coumencement
Tuit li bien sont sien par nature
Et a lui sen vont par dreture
Car de lui muevent toz et viennent
Et vers lui leur dret sentier tiennent
Il navra ja de nul mal cure

Car sa bonte est toute pure
Toute nete saintiesme et seine
Sanz rien de nule malevoine
Car li mal li sont a contrere
Pour ce les covient ensus trere
De lui et de trestous ses biens
Car ce nest fors ordure et fiens
Si la covient descendre au fonz
Et le bien si demeure amont
Devant dieu qui est cler et pur
Li max qui est lez et oscur
Et tenebreus sus toute rien
Descent aval sesit le bebien
Tout ce qui vient par nature
Einsi con len voit de lordure
Dun vin quant est mis en ^.i. vessel
Si que en haut demeure li bons
Et la lie sen vet au fonz
Qui mauvese est et rien ne valt