f. 027v - 028

Car se clergie fust perdue
Ja de dieu rien ne fust seue
Ne james la gent ne seussent
Quel chose mieuz fere deussent
Si fust tout le monde dampnez
Et mau feust tout li hons nez
Que rien ne fust par lui seue
Ne que par une beste mue
Et tout le bien est ore escuz
Et des .vii. ars touz esmeuz
Que ceus troverent par leur sens
Et pour ce orent il pourpens
De dieu amer et sa vertu
Et que dex est aide et fu
Et si les escrut plus de foi
Si coume en lencienne loi
Mes ore perissent les clergie
Par nos maus et par nos folie
Einsi con par ci retenu

Et nont li grant et li menu
Mes nus si nes veut mes entendre
Pour les richeces quil en prennent
Que nul bien ne veulent aprendre
Quant il doivent aucun bien aprendre
A clergie dont il peussent
Estre aaise et riche fussent
Tant les enveulent il gaber
Mes ainsi les veut cil loer
Qui leur mestres est et leur sire
Et a qui plest tant le mesdire
Qui leur fera le maleur
Et de touz max seront seur
Een enfer qui put en abisme
Lors mesdiront il deus meismes
Et diront que onques mar furent
Quant ne firent ce que il durent
Or lesseron ce bien ester
Que plus avront a conquester