f. 046v - 047

Ausi come une muse iroit
Entour une pome meure
Einsi porrroit aler la muse
Et un ^/.tant ^/.hon con terre dure
Entour la terre par nature
Et quant de desouz nous vendret
Il li sembleroit tout adroit
Que nous fusson de devant li
Si conferoit a nous de lui
Que ses piez vers les noz rendret
Et sa teste vers le ciel dret
Ausi coume nous feson ci
Les piez en terre devers mi
Et sil aloit ades avant
Droit avant li il iroit tant
Quil revendroit au leu premier
Dont il se prist a eslognier
A la premiere estature
Ou il fust ainsi par nature
Si dui home se dessevroient

Lun de lautre et sen iroient
Li un tout droit vers oriant
Et li autre en occident
Et quen dui igaument alassent
Il covendret quil sencontrassent
Desouz le leu dont il semurent
Et puis la ou premier furent
E puis vedroient pardevant
Que lors avroit chascun .i. tour
E et desouz la terre entour
Ausi coume en tour une roe
Qui en terre seroit enclose
Einsi la terre entour iroient
Si coume cil qui droit iroient
Envers le mileu de la terre
Car bien pres de lui se serre
Qui plus poise plus pres se tret
Et plus vers le mileu se tret
Et quant plus se tret len dedenz
Plus trueve len terre pesanz