f. 060v - 061

Tant con de lautre se conbat
Noirs est et beste mout orrible
En eue ^et en terre penible
Si sont torel qui si blont sont
Qui grosse bouche et tel teste ont
Si large que la fendeure
De lune oreille a lautre dure
Corne quenvirom li remuet
Quant pris est douter ne le puet
En ynde une autre beste i a
Quen apele menthochora
Vis dome et .iiij. oreillez enz
Li sont en la bouche dedenz
Enz de chievre cors de lion
Et la queue dun corpion
Voiz de serpent qui par ses chans
Atret et devere deveure les gens
Et est plus isnele daler
Que nest uns oisiax de voler
Bues i a qui piez roons ont

Quatre cornes en mile front
Une beste i a de biau cors
Quen apele mononcheros
Cors de cheval piez dolifant
Teste de cerf eus clers et grans
Queues hautes contrues ont
Et une corne emni le front
Qui de longueur a .iiii. piez
Drete et ague coume espiz
Et quan quele ataint devan li
Deront et depiece parmi
Sele est prise par nul engin
Si se let morir par desdaing
Mes ele ne pue^t estre prise
Fors par une vierge a devise
Bien paree pour lui decevre
Et cele son giron li cevre
Lors sen vient a la beste tanstost
Vers la pucele si sendort
Et son giron mout souplement