f. 066v - 067

Une autre i a qua non athis
Qui ne puet estre nul jor pris
Nenchantez se par doz chant non
Dont il ot volentiers le son
Mes quant le chant premier escoute
Sa queue en ses oreilles boute
Quil ne loie et se tret en sus
Pour ce que ne soit deceuz
Autres i a qui ont non tygris
Que len prent aucune foiz vis
Ce est cil dont le triade est fez
Qui autre venin oste et desfet
Une maniere i a devers
A deus braz si lons et divers
Car les olifans en abatent
Et tuent quant pres deus senbatent
Le serpent vit mout longuement
Et quant viex et feble se sent
Si se confont par geuner
Et se lesse si afamer

Que pou li remaint de son cors
Lors se met par .i. pertuis hors
Daucune pierre mout estret
Et se met hors par tel destret
Que la pel i demeure entiere
Puis revient autre pel arriere
Ainsi refourme son aage
Coume beste qui mout est sage
Serpens i ra dautres maniere
Qui m*aintes precieuse pierre
Es testes et en leur euz ont
Qui maintes vertus en eus ont
Ce parole des pierres dynde
En ynde crest li aimans
Une pierre de vertus grans
Qua lui tret le fer et ravist
Pour la vertu qui en lui gist
La croist li diamanz entiers
Qui ne pue^t estre depeciez
Ne usez se par sanc de bue non