f. 072v - 073

Coume il se confessent a dieu
Pres deus metent encens et feu
Et cuident que cele fumee
Sen aille a Dieu por leur soudee
Mes nest pas ainsi coume il croient
Seint jhean bautiste mescroient
Qui les bautiza premerains
Car dire leur covenoit ains
Touz les pechiez a lui meismes
Et puis recevoient bautesme
Dont seint jhean meismes dist
Que tant come hons ses pechiez dit
A un autre cele vergoigne
Quil a du dire sa besoigne
Si est en leu de penitance
Et de ses pechiez alejance
Et puis de pechier se retient
Quant il set que savoir covient
A un autre tout son affere
Ains que vers Dieu se puisse trere

Et ce dit seint jhean bautiste
Que par bautesme nous rent quites
Envers dieu de touz nos pechⁱez
Par conffession espurgiez
Dont cele gent son deceu
Que malement ont retenu
Cele ^/sont ^/part une autre gent
Crestien en Dieu maucreant
En bataille puissant et fort
Que sarazin doutent si fort
Quil ne leur osent rien forfere
Ains leur sont douz et debonere
Et sont touz enclos environ
De gent mescreant et felon
Cele gent sont bon crestien
Et a non georgien
Que seint jorge apelent touz jours
En batailles et en estours
Contre paiens et si laorant
Sus touz autres seinz et honorent