f. 083v - 084

Que lun emporte entre ses braz
Et n li autre la suit tot las
Le chien les biens son seigneur garde
Doume et de fame male garde
Sele counoist a son seigneur
Et laime de mout grant amour
Que sovent avient a la mort
Ne veut guerpir a droit ne a tort
Et de sa mort tant se deudra
Que souvent de duel sen mourra
En aucun leu en engleterre
A chiens que li larron vont querre
A qui leur seigneur ont enble
Et suivent tant quil ont trove
La moustoile quest si petite
Mort et ocist le basilique
Et se conbat tant au serpent
Que locist outreement
Ses faonnez si sovent muet
Qua paines jus trover les puet

Le hericon pomes abat
De sus la terre et embat
Puis sen va tot chargie de fruit
Chantant et menant son deduit
Quant mal li veut fere autre beste
Si met ensemble piez et teste
Et se tient si en .i. tourcel
Les aguillons dentour la pel
Que beste ne si ose embatre
Pour assaillir ne pour conbatre
Li agneax qui onques ne vit
Le leu doute et le guenchist
Et autres bestes rien ne doute
Ainz se met entre les et boute
De la maniere des oisiaus
Li aigles par les ongles prent
ses poucins et les tient forment
Celui qui fermement le tient
Si laime et a lui le retient
Celui qui se tient feblement