f. 130v - 131

Puis vodrent du soleil enquerre
Combien il est desus la terre
Et combien le cours a de grant
Si le trouverent vraiement
Que toute la terre dassez
Quant ces .ij. orent mesurez
Le soleil la lune et la terre
Si porent de legier enquerre
Des autres estoiles empres
Combien chascune a loig et pres
Et de la grandeur de la lune
Dont il ne troverent mesure
Que son cors vait plus de roont
Que la terre na environ
Fors .iij. des planetes sanz plus
Cest mercurius et venus
Et la tierce si est la lune
Ce sont de ces .iij. dont chascune
Est plus petite de la terre
Dont chascun puet pour voir _enquerre

Si set lart de gyometrie
Avec celui dastronomie
Ce li covient premier savoir
Ainz quil puisse enquerre le voir
Mes porce que tuit ne sont mie
Sage mestre de astronomie
Qui le peussent esprover
Voudrons nous apres raconter
Combien la terre est longue en li
Et coume ele a despes parmi
Et la lune est longue desus
Et le soleil qui est ensus
Combien de grandeur chascun a
Si com tholomer les prova
Des estoiles du firmament
Vous dirons nous tot ensement
De leur biaute de leur grandour
Et du firmament la hautour
De trestout ce diron le grant
Me^s du roi diron mes avant