f. 148v - 149

Et qui trestouz biens en lui a
Son paradis estent partout
Con cil qui est sires de tout
Em paradis sont tuit li angre
Tuit li seint et tuit li arcangre
Qui de devant dieu rendent tuit
Gloire et loenge et grant deduit
Que nus nest qui peust entendre
Ne cuer doume ne puet aprendre
Quest paradis ne con grant joie
Que cil ont a qui dex lotroie
Le meilleur clerc de tot le monde
Tant coume il est a la roonde
L^e plus soutil le plus vaillant
Conques fust en terre vivant
Ne qui james estre poist
Se nul langues parelans eust
Dont chascune parlast par soi
Et si eust mil cuers en soi
Les plus soutilz quen puet entedre

En cors doume pour mieuz entendre
Et chose peust avenir
Quensemble peust venir
Dedenz son cors et plus deussent
Penser au mex que il peussent
Touzjours a paradis descrire
Chascune langue et poist dire
Lentention de chascun cuer
Ne pourroient pas a nul fuer
Moustrer em parole nen rime
Deg la grant joie dou millisme
Que li plus povres i avra
Honiz est qui la ne sera
Con cil qui est em paradis
Ne voudroit pas estre touz dis
De tout le monde rois poissant
Pour ferre trestouz ses coumanz
Par covant quil fust .i. seul jour
Fors de paradis a sejour
La est est la vie pardurable