CHANTILLY, Bibliothèque du château, 0477 (1469) (Reproduction intégrale)

La terre habunde desouz li Et quant il couche en occident Li ombres est en oriant Quant le soleil est desouz nous Lors avons nos lombre vers nous Qui ades sen vet abessant Le coig par devers oriant Tant le soleil nous reluist Et jours rent sitost la nuit En ce .ii. figures ici Le pouez veoir tout ainsi Coument la lune rechoit diversemement lumiere Et puis que jour et nuit veez

[image: two diagrams circular diagrams with a red cross showing the placement of the sun and its consequent shadows, first with the sun at the left and top points with the shadows in the right and lower quadrants, then with the sun at the right and bottom points with the shadows in the upper quadrants (labels on each: sol, ombre)]

Empres la lune entendez Coument ele recoit lumiere Du soleil en tel maniere Que ades est ou quele soit La moitie pleine en son endroit Quant plus reonde la veons Et que bien plaine lapelons Et quant plus est du soleil Tant vioit len mains de soleil Et quant ele est tout dret desus Lors napert ele pas a nus Car lors ele endret la terre Et le soleil quele i vet querre Si que ele est clere pardela Et oscure par de decha Et pour ce nen veons nos point Et quant ele a passe son point Quen sus du soleil se remue Lors apert sa clarte cornue Et quant plus sen vet esloignant

Tant nous apert plus reluissant Jusquatant quele apert demie Et lors a la quarte partie De son cercle a le tout entour Ou chascun mois perfet son tour Si sen vet ades esloignant Et sa clarte en descroissant Tant que trestout apert le cercle Em senblance dune roele Mes lors est ele si ensus Du soleil coume ele ^/.plus^/. puet En son cercle et dautre part Droitement envers son esgart Si que la plus enluminee Est toute envers nous tornee Lors est la terre entre deus Si nes puet ^on veoir endeus Sus terre se mout petit non Mes lun des .ii. veoir puet on Jusquau couchier des que il nest

Et li autre desus terre est Des quil apert vers oriant Et lors voit on celui couchant Pour ce nes puet on pas veoir En .ii. ensemble main et soir Mes la lune qui a perefet La moitie de son cours souvent Desouz le soleil approchant Et la clarte amenuisant Tant quele nous rapert demie Si coume a la quarte partie Car lors a ele .iii. quartiers De son cercle assez entiers Et est du soleil si procheine Coueme a la quarte premeraine Mes ades sen approche plus Tant ^con cornue apert cha jus Et dautre part si con devant Einsi sen vet amenuisant Et vet approchant du soleil

Tant quen ni voit point daperel Et en ceste figure ci Poez veoir ce que je di Coument les esclipses de la lune aviennent A la lune souvent avient que clarte predre li covient Et lors coume ele apert plaine Si devient ausi coume vaine Petit et petit defaillant Bien avie^z[?]z oi ci devant Coument ele recet lumiere La moitie du soleil entiere Mes esclipser la covient De nule part clarte ne li vient

[image: diagram of concentric circles showing the position of the moon around the earth; shading for the moon's phases seems to have been omitted (label: terre)]

Et si ne li avient fors lors Que de la moitie de son cors Que vers le soleil est tornee Ne soit ades enluminee Mes la lune qui pas ne vet Si dret come le soleil fet Passe aucune^foiz par tel voie Que la terre toute lombraje Car la terre est plus grant de li Et pour ce lombra ele si Car entreus .ii. deus Tant con la lune se decline Sicon le cours est plus isniax Et lors la refiert li solaux De ses rais et clarte li rent Par quoi la lumiere reprent ^bMes quant passe mains par cel ombre ^aEt ^tant li faut il mains encontre De la clarte quele rechoit Du soleil quel part quele soit

Fors que a lombre se doit prendre Si poez ce einsi entendre Sune ligne passoit parmi La terre par le point enmi Tout outre danbedeus par force Et passat outre les cors Du soleil tout par esgart Li autres chief par une part Qui du dret de terre einsi loing Passeroit tout par mi le poing De lonbre touz jourz par iqui La lune qui sen vet par ci Decha et dela aucun mois Passe parmi aucune foiz ^bEt lors chiet ^ele dedenz lombre La clarte du soleil venir Qui a lui ne puet parvenir Et quant plus ^est endret la ligne De tant plus sa clarte define Ausi voit on aucune foiz ^aqui de toutes pars li enconbre

La lune u mileu de son mois Quant plus est plaine anoientir Et sa clarte toute oscurcir Dedenz une nuit et reprendre Que vous ^pouez ici entendre De lesclipse du solleil Du soleil qui pert sa resplandor Aucune foiz enmi le jour Et vet ainsi coume a declin Quen apele eclipse en latin Ceste defaute de lumiere Avient en iceste maniere Quant la lune qui vet desouz Vient contre le soleil et nous

[image: at the center of the page, diagram of an eclipse, with two concentric circles in brown ink representing the sun's orbit; a circle in brown and red ink representing the sun (label: soleil); the umbra of the eclipse piercing the sun's orbit (label: eclip / se; lu / ne; ter / re)]

Tout droit enmi la drete ligne Si covient que ele decline La clarte du soleil en haut Si quil nos semble quel defaut Car la lune nest pas si pure Que le soleil puisse outre luire Si con parmi une autre estele Tout ausint con dune chandele Qui loing de vostre esgart seroit Puis tendissiez la main endret De la chandele un^e veue La clarte vous seroit tolue De la chandele en vostre esgart Plus ne verries cele part Quant la main plus endret metrez Mains de la chandele verrez Tant que point nen verroiz iqui De lesclypse autel vous di Contre le soleil et la lune Nont pas une une voie commu_ne

Ainz a la lune ue une autre voie Qui de cele .i. pou se desvoie Por ce si nous covient entendre Tout ainsi con len seut entendre Jusquaua soleil tant con le voit Einsi entendre cele ligne Dont souventes foiz se decline La lune decha ou dela Chascun jour sicoume ele va Par desouz le soleil ades Mes con de cele ligne empres Quele passe tout droit parmi Si nous tost le soleil iqui Si que veoir ne poons pas Tant come ele mains^t en ce quas Lors fet ele a la terre ombre Qui les rars du soleil enconbre A venir cele part sus terrre Dou endret le soleil se serre Et ceus qui sont lors cele part