42v La Complainte dou conte Hue de Nevers

Quil a maint borc et mainte vile
Laissie por morir au servize
Celui Seigneur ⋅ qui tot justize
Et Diex li rent ⋅ en bele guize
Ne cuidiez pas ⋅ que se soit guile
Quil fait granz vertuz a devize
Bien pert ⋅ que Diex a sarme prise
Por metre en son roial concile

Encor fist li cuens a sa mort
Quavec les plus povres samort
Des plus povres ⋅ vot estre el conte
Quant la mors .i. teil home mort
Que doit quele ne ce remort
De mordre ⋅ si tost .i. teil conte
Car qui la veritei nos conte
Je ne cuit pas que jamais monte
Sor nul cheval feble ne fort
Nuns hom ⋅ qui tant ait doutei honte
Ne mieulz seust que honeurs monte
Na ci doleur ⋅ et desconfort.

Li cuers le conte ⋅ est a Citiaux
Et larme la sus en sains ciaux
Et li cors en gist outre meir
Cist departirs est boens et biaux
Ci a trois precieulz joiaux
Que tuit li boen doivent ameir
La sus elz cielz fait boen semeir
Nestuet pas la terre femeir
Ne ne ci puet repaitre oiziaux
Quant por Dieu se fist entameir
Que porra Diex ⋅ sor li clameir
Quant il jugera ⋅ boens et maux ⋅

Ha cuens Jehan biau tres dolz sire
De vos puisse hon ⋅ tant de bien dire
Com hon puet dou conte Huede faire
Quen lui a si bele matyre
Que Diex cen puet joer et rire
Et sainz paradix cen resclaire
A iteil fin ⋅ fait il bon traire
Que hon nen puet nul mal retraire
Teil vie ⋅ fait boen eslire
Doulz et pitouz et debonaire
Le trovoit hon ⋅ en toz afaires
Sages est ⋅ quen ces faiz ce mire

Mes sire Erart ⋅ Diex vos maintiegne
Et en bone vie vos tiegne
Quil est bien mestiers en la terre
Que cil avient que tost vos preigne
Je dout li pais ⋅ ne remeigne
En grant doleur et en grant guerre
Com li cuers ⋅ el ventre vos serre
Quant Diex a mis ⋅ si tost en serre
Lou conte ⋅ a la doutee enseigne
Ou porroiz teil compaignon querre
En France ne en Aingleterre
Ne cuit pas com le vos enseingne

Ha ⋅ rois de France ⋅ rois de France
Acre est ⋅ toute jor en balance
Secoreiz la ⋅ quil est mestiers
Serveiz Dieu ⋅ de vostre sustance
Ne faites plus ci remenance
Ne vos ne li cuens de Poitiers
Diex vos i verra ⋅ volentiers
Car toz est herbuz ⋅ li santiers
Con suet batre ⋅ por penitance
Qua Dieu sera ⋅ amis entiers
Voit destorbeir ⋅ ces charpentiers
Qui destorbent notre creance.

Chevalier ⋅ que faites vos ci
Cuens de Blois ⋅ sire de Couci