58r Li Diz de la voie de Tunes
Facsimile
Ja coars nenterra
En paradyx celestre
Si nest nuns si coars
Qui bien ni vouxist estre
Mais tant doutent mesaize
Et a guerpir lor estre
Quil en adossent Dieu
Et metent a senestre
Des lors que li hons nait
a il petit a vivre
Quant il a .xl. ans
Or en a mains on livre
Quant il doit servir Dieu
Si saboivre et enyvre
Ja ne se prendra garde
Tant que mors le delivre
Or est mors ⋅ qua il fait
Quau siecle a tant estei
Il a destruiz les biens
Que Dieux li a prestei
De Dieu ne li souvint
Ne yver ne estei
Il aura paradix
Ce il la conquestei
Foulz est qui contre mort
Cuide troveir deffence
Des biaux ⋅ des fors ⋅ des sages
Fait la mors sa despance
La mors mort Absalon
Et Salomon et Sance
De legier despit tout
Quades a morir pance
Et vos a quoi penceiz
Qui naveiz nul demain
Et qui a nul bien faire
Ne voleiz metre main
Se hom va au moustier
Vos dites je remain
A Dieu servir dou votre
I estes vos droit romain
Se hom va au moustier
La naveiz vos que faire
Nest pas touz dune piece
Tost vos porroit maufaire
A ceux qui i vont dites
Quailleurs aveiz a faire
Sans oir messe sunt
Maint biau serf embiaire
Vous vous moqueiz de Dieu
Tant que vient a la mort
Si li crieiz merci
Lors que li mors vos mort
Et une consciance
Vos reprent et remort
Si nen souvient nelui
Tant que la mors le mort
Gardeiz dont vos venistes
Et ou vous revandroiz
Diex ne fait nelui tort
Nest nuns juges si droiz
Il est sires de loiz
Et cest maitres de droiz
Touz jors le trovereiz
Droit juge en toz endroiz
Li besoins est venuz
Quil a mestier damis
Il ne quiert que le cuer
De quanque en vos a mis
Qui le cuer li aura
Et donei et promis
Notes and Questions
Please sign in to write a note for this page