Page 53

thue kleine rosinlein darein, nimmb ein guottes prüelein
von einem koppen, unnd ein wenig feyst, machts allso
woll unnder ein annder, nembt ein guottes meell, unnd
eyer, macht ein guottes teüglein an, wergells fein
dhün auß, auffs aller dünest, schlag das gehackht dar=
auf, mach kräpflein darauß, stopfs oben auff mit
einem möser, das der dampf dar von khan, bachs im
schmaltz, giebs zu essen, allso hastu zungen kräpfell
gerecht unnd guott.
schlückh kräpfell macht
allso.
Item so nimb ein nüeren von einem feysten kalb, über
süedet ihn, unnd wann er gesotten ist, so hackh in klein
grüne kreüttell, mustrat blüet, ein wenig geriben sem=
ell, schlag eyer daran, rüers unnder ein annder, saltz
recht, für eins zum anndern, so nimb eyer dotter, unnd
ein schönns meell, mach ein guottes deüglein an, saltz
recht, wergells fein dhün auß, schlag das gehackht
dar auf, mach kräpfell dar auß, laß süeden in einer fleisch
brüe, oder wasser, unnd wanns gesotten sein, so thuot die
kräpfell herauß, legs in ein sülber, geüß ein guottes fleisch
brüe daran, gilbs ein wenig, thue schmeckhente kreütt=
ell daran, mustrat blüet, laß allso auf einem rösth
süeden•