Beinecke Library, Takamiya Deposit 54

ReadAboutContentsHelp

Pages

1
Complete

1

[starts line 31] Festum Sancti Dunstani Seint Dunston was of Engelond  come of good more{[?] of [?]} Miracles our lord did for hym  er he were ybore Whan he in his moders wombe was  on a Cadelmasday As þe folk were at chirche  as to þe time lay And þei stoden wiþ her liȝt  as men don riȝt nowe her light queint oueral  no man wist howe hure light brent swith wel  ⁊ al oþer was oute þe folk þer of had wonder  and stoden in gret doute

Last edit 11 months ago by KendallB
2
Complete

2

xliiij
And þei speke ichon to oþer  in what manere it were That it queynte so sodeynly  her light þat þei bere As þei stoden and speke þerof  in gret wonder echon Seyn Dunstons moders taper  on fire wex anon As she it helde in her honde  she nyst whennys it come The folk stoden and biheld  grete wonder þerof þei nome Non wist whennys it come  but þorgh our lordis grace Þer of þe teende all her liȝt  about in þat place Who was it but our lord crist  þat from heuene liȝt sende The folk þat stood þer about  her tapere þerof tende Therof þat holi childe  þat in her wombe was þere All Engelond shuld be liȝt better  þen euere it were This child ixC ȝeere  and xxvti right Aftere þat our swete lord / in his moder was liȝt And þe first ȝere of crownyg  of king athelson His moder hight Knidride  his fader Erston Whan þis child was ibore  his frendis toke hym to ȝeme They lete him put to Glastenbury  to norish ⁊ to queme To teche him his bilieve  Pater noster ⁊ Crede Þat childe wex ⁊ wel ythrof  as it most nede Litel hede toke he of þe world  but to goodnesse drowe Ech man þat herd of hym speke  had of hym joie inowe Whan he was of mannys witt  to his Eine he gan go Erchbisshop of Caunterbery  Seint Aldem þat was þo He made with hym ioye jnowe  ⁊ euerlenger þe more For he so moche goodnes  ⁊ of his wise lore For deynte þat he had of hym  he lete hym sone bringe Bifore þe Prince of Engelond  seynt athelston þe kinge Þe king him made ioye jnowe  ⁊ graunted hym al his bone What þinge he wolde him bede  Ȝif it were to donn Þoo preide he him of an abbay  þat he was in forþ brouȝt In þe toune of glastenbury  þat he hym warned nouȝt Þe kinge graunted his bone anon  and after hym also Edmonde his broþer þat was kinge  ⁊ in his pouere ido To Glastenbury he went sone  þe good man seint donston Þo boþ þe kingges ȝaue hym leue  Edmond ⁊ athelston Of þe hous of Glastenbury  ordenour he was And made moch of her good rule  þat neuer among hem nas And þat hous was bigonne  CCC ȝere þertofore
Last edit 11 months ago by KendallB
3
Complete

3

And eke .Liij. ȝere / or seint Dunston was ibore For þer was ordre of monkis  er seint Patrik come And er Seint austin brouȝt  to engelond cristendome And seint Patrik deied  CCCC ȝere  ⁊ lij. ȝere Aftere our swete lady  our lord on erth bere But monkes þer ner first  but as in hunting echon As men þat drowe to wildernes  for drede of goddis foon Seynt Dunston and seint Ethelwold  as our lord it say Both were made prestis  boþ on one day Ther aftere sone to Glastenbury  seint Dunston þo wende Abot þer in he was made  his lif to amende And for he nold by his will  no time ydelve A prive smythie be his Celle  he gan hym byse For whan he most of his preiers / rest for werynesse To work he wold his hondis do / ⁊ flee all ydelnesse Serue he wold poor men  þe whil he myght dure Al daie for þe loue of god . he toke of hem no hure And whan he satte at his werk  his hondis at his dede And his hert on Ihesu crist  his mouþ his bedis bede So þat all at on tyme  he was on þre stedis His hondis þer / his hert at god  his mouth to bede his bedis Therfore þe deuel to him  had envie ⁊ onde And on a tyme come to his smythy  him forto sonde Right as þe sone a doun went  as he awomman were And spak wiþ him of his werk  wiþ a leghing chere And seide þat she had wiþ hym  a gret werk to don Flitting she smote here ⁊ þere  in a noþer tale son This holy man had gret wonder  þat she was here ⁊ þere He sat and longe hym biþouȝt  who þat it were He biþought him who it was  he drow forþ his tonge And leide hem in þe hoot fuyr  ⁊ spak faire ful longe Til his tongis were a fur  and sith stille inowe He hent þe deuel by þe nose  ⁊ right fast hym drowe He twynched him ⁊ shoke him wel  þat þe fuyr out blast Þe deuel wrinched here ⁊ þer  ⁊ he helde euere fast He ȝellid / and lept / ⁊ drowe aȝein  ⁊ made grisly chere He nolde for all his wynnyng þat he had come þere With his tongis he stroke his nose  ⁊ touched hym euere sore Til it was in þe nyght  þat he mot se no more

Last edit 11 months ago by KendallB
4
Complete

4

xliiij
Þe Fende was glad and bliþ inowe  wan he was out of honde He grad and fley away  þat men herd al þe londe Out what hath þis calf ydo  what haþ þis calf ydo Into þe contre men herde wide  þe shrewe cryde so Better hym had haue be at home  and ysnytte his nose Þan hied so fast þidere  to tilye hym fro þe pose Sith þis Abot seint Donston  had grete powere With king Emond þat was þoo  ⁊ was his counselere Aftere kinge Edmondis deth  a good while þer was gon Edwyne his sone king was made  after þat anon Edwyne þe kinge had euel rede  ⁊ þeraftere he drowe Wiþ saint Donston he wex wroth  siker with gret wowe He put him out of his abbey  and did hym shame ynowe The more shame he him did  þe more þe good man lowe He drof him out of Engelond  ⁊ did hym crye fleme Þis good man went forþ ful glad  ne toke he no ȝeme To þe Abbey of seint Amande  biȝonde þe se he drowe And soiourned þer longe  and lad good lyf ynowe Aftere kinggis Euwyne day  Edgar þat was his broþer Was made king for he was  ner þan a noþer Good man he bicome  ⁊ loued wel holy chirch Ech man þat him rad þerto  after he wold worche Mon told him of seint dunston  his broþer drof on londe With wronge for his goodnes  ⁊ he gan understonde Aftere him he sent anon  þat he come home sone And was with him his counseilere  of þat he had to done Seint dunstone come home aȝein  ⁊ faire was underfonge And had his abbey in pees  from which he was so longe With king Edgar he was wel  and all his counsellere Moche men speke of his goodnes  wide fer ⁊ nere It bifelle þe Bisshop of Worceter  was to þe dethe Þe kinge ⁊ Ode þe Erchbisshop  þerof toke her rede And Seint Dunston þe abbot  bisshop þei made þere To make him up in goddis lawe  his will þof it nere Men axed at þe Archbisshop  of Caunterbery . Sire Ode Wherfore þei him bisshop made  ⁊ his grace was so good For he shal seide þis good man  after me here be Erchbisshop of Caunterburye  as men shul ȝit se What wote ȝe þis oþer seid  ȝe speke foly iwis
Last edit 11 months ago by KendallB
5
Complete

5

Thow wost nomere þan þi fote  vp god it is Heve frendis quod þis good man  ȝe thru blame me nouȝt Wel I wote what Ihesu crist  in my mouth haþ brouȝt As who seiþ of þat þing  þat ȝe han of me sede Telle ȝe may if it falle  after þat I am dede Bisshop he was of london  seint dunston siþ also Of london and of worcetere  he helde both two It bifelle þe Erchbisshop of Caunterburye  Sir Ode was dede Þe pope and king Edgar  þerof toke her rede And made þe good seint Dunston  Erchbissop þere Good men þat knewe him wel  glad þerof were The Cristendome of Engelonde  to good stat he drewe And þe right of holy chirch  he held up fast ynowe He formed þorgh all engelond  þat eche person shuld chese To kepe hem chaast from lecherye  or his churche lese Seint Aþelwold þat time  was bisshop of wynchestre And Seint Oswold þe good man  bisshop of Worcestre Thise tweyn Bisshopis  and Seint Dunston were of one rede And Edgar þis good dede king  to do þis good dede Thise bisshopis went about  þorgh all engelonde And wicked personys cast out  þer shuld hem non a stonde Her churches an her oþer good  clenly hem byname And bisette it on good men  þorgh graunte of þe pope of Rome xlviij . Abbeis  of monkis and of nunne Of tresour þei did rere  of þe persons þei had wonne And þan it was wel bet bysette  þan it was erst for shrewen For euere þer good maisters ben  some good þey wil shewen Good were þe bisshope þre  at oon tyme þoo The bettere is Engelonde ȝit for hem  ⁊ shal be euermo Our lord ȝaue in erþe  þo Seint Dunston fair grace At oon tyme as he was  in a priue place His fader ⁊ his moder eke  in ioye of heuene lay Aftere þat þei dede were apertly he say Grete loue oure lord hym kidde  whan he shewed hym þere So moch of his priuete  whill he alyue were As he lay anoþer tyme  in his bed anyght He see þe Ioie of heuene  and a plas þer in briȝt Aungels herd sing  a mery songe þer Inne Þat men Syng ȝit in holy chirch  whan þei was bygynne

Last edit 11 months ago by KendallB
Displaying pages 1 - 5 of 7 in total