Bodleian Library Ashmole 43

ReadAboutContentsHelp

Pages

1
Complete

1

[Line 11]

syn dounston
{Dunstan 37} Seyn dunston was of engelond : icome of gode more Miracle our Lord dude uor him : ar he were ibore • Uor þo he was in is moder wombe : acandelmasse day Folc was at chirche jnouȝ : as to þe tyme bilay • As hi stode alle myd her liȝt : as me deþ ȝut jnouȝ • Hor liȝt queyntte oueral : hor non nuste hou • Her riȝt it barnde swiþe wel : ⁊ her riȝt it was al oute • Þat folc stod in gret wonder : ⁊ was þer of in gret doute • bispoke ek ech to oþer : in wuche maner it were Hou it queynte so sodeynliche : þat liȝt þat hi bere As hi stode ⁊ speke her of : In gret wonder echon • Seyn dunstones moder taper : afure werþ anon • Þat heo huld þer in hire hond : heo nuste wanne it com • Þat folc stod ⁊ þis bihuld : ⁊ gret wonder þer of nom • Ne non nuste wanne it com : bote þoru our lordes grace Þer of hi tende al hor liȝt : aboute In þe place • Wat was þat bote our lord crist : fram heuene þat liȝt sende • þat folc þat stod aboute : hor taperes þer of tende • Bote þat of þat þulke holi child : þat in hire wombe was þere Al engelond shulde be iliȝt : bet þen it er were Þis child was ibore nyne hondred ȝer : ⁊ fyue ⁊ twenti riȝt • After þat our swete lord : in is moder was aliȝt • þe verste ȝer of þe crounyng : of þe kyng aþelston His moder het Kynedride : his fader het Herston • Þo þis child was anerþe ibore : his frendes nome þerto hede • Hi let it do to glastynsburi : to norsi ⁊ to bede • To teche him ek his bileue : pater noster ⁊ crede • Þis child wox ⁊ wel iþei : as it moste nede • Litte ȝeme he nom to al þen world : to alle godnesse he drouȝ • Ech man þat hurde of him speke : hadde of him Ioie Inouȝ • Þo he was of manner wit : to is vncle he gan go • {Aldelme} To þe erchebiscop of canterbure : seyn aldelm þat was þo • {Cant A[?]}
Last edit 12 months ago by KendallB
2
Complete

2

{81} Þat made wiþ him Ioie Inouȝ : euer þe leng þe more • Þo he isei of is godnesse : ⁊ of is wise lore • Uor deynte þat he hadde of him : he let him sone bringe • Biuore þe prince of engelond : aþelston þe kynge • {Athilstan R. Angl.} Þe kyng him made Ioie Inouȝ : ⁊ grantede al is bone • Of what þing so he wolde bidde : ȝif it were to done • Þo bad he him an abbey : þat he was on vorþ ibroȝt • In þe toun of glastynbure : þat he ne wurnde him noȝt • Þe kyng him grantede is bone anon : ⁊ after him also • Edmond is broþer þat was kyng : ⁊ in is poer ido • To glastynbure wende sone : þe gode mon seyn dunston • Þo bere þe kynges him ȝeue leue : edmond ⁊ aþelston • Of þe hous of glastynbure : a gret ordeynor he was • made muche of hor gode reule : þat neuer er among hem nas • At þat hous þat was uerst bygonne : four hondred ȝer byuore • ek þre ⁊ þrittififti ȝer : ar seynt dunston were ibore • Uor þer was ordre of monekes : ar seyn patric com ar seyn Austyn to engelongd : broȝte cristentom • seyn Patric deide : four hondred ⁊ to ⁊ fifti ȝer After þat our swete leuedi : our lord anerþe ber • At none monekes þer nere uerst : bote as in hudynge echon • as men þat drowe to wildernesse : vor drede of godes son • Seyn dunston ⁊ seyn aþelwold : as our lord it bisay • Iordeyned to prestes were: boþe in one day • after sone to glastynbure : seyn dunstan anon wende • Abbod he was þer Imad : his lif þer uorto amende • uor he nolde bi is wille : no tyme idel be • A priue smyþþe bi is celle : he gan him bise • Uor wen he moste of is orisons : reste uor werinesse • To worke he wolde is honden do : to fle idelnesse • Seruy he wolde poure men : þe wule he miȝte dure Al day uor pe loue of god : he ne kepte of hem non hure wen he sat at is worke þere : is honden at is dede • As herte at ihesu crist : is mouþ is beden sede • So þat al at one tyme : he was in þre studes His honden þere is herte at god : is mouþ to bidde is bedes Þeruore þe deuel hadde to him: gret enuye ⁊ onde • A tyme he com to is smyþþe : al one him to fonde • Riȝt as þe sonne eode adoun : as he wommon were spak wiþ him of is worc : wiþ liȝynde chere sede þat he hadde wiþ him : gret worc to done • Truflynd heo smot her ⁊ þer : ⁊ in anoþer tale sone

Last edit 12 months ago by KendallB
3
Complete

3

Þis holi mon hadde gret wonder : þat heo was her ⁊ þere He sat longe ⁊ biþoȝte him narwe : ho it were Þo he biþoȝte him ho it was : he arauȝte him ner is tonge leide in þe hote fure : ⁊ spac vayre wel longe • Uorte þe tonge was al afure : ⁊ seþþe stille Inouȝ • Þe deuel he hente bi þe nese : ⁊ wel uaste drouȝ He tuengde ⁊ schok hire bi þe nese : þat þat fur out blaste • Þe deuel wrickede her ⁊ þer : ⁊ he huld euer vaste • He ȝal ⁊ hupte ⁊ drouȝ aȝen : ⁊ made grislich bere He nolde uor al is biȝete : þat he hadde icome þere Wiþ is tonge he schok is nese : ⁊ twengd him euer sore • Uorte it was wiþþinne nuȝte : þat he ne miȝte se namore Þe screwe was glad ⁊ bliþe Inouȝ : þo he was out of is hond • He fley ⁊ gradde bi þe lust : þat me hurde in to al þat lond • Out wat haþ þis calwe ido : wat haþ þis calwe ido • In þe contreie me hurde wide : hou þe screwe gradde so • As good þe screwe hadde ibe : halbe isnut acom is nese He ne heide namore þuderward : to telie him of þe pose • Þis holi abbod seyn dunston : hadde gret poer Wiþ kyng edmond þat was þo : ⁊ was is conseler After kyng edmondes deþe : a gode wule þer was agon • {Edmundus R.} Þat edwyne is sone was kyng ymad : ⁊ noȝt after anon • {Edwynus [?] fil} Þis edwyne hadde vuel red : ⁊ þat after he drouȝ • Wiþ seyn dunston he was wroþ : siker wiþ gret wouȝ Of is abbeie he dude him out : ⁊ dude him schame Inouȝ • Þe more schame þat he him dude : þe more þe godemon louȝ • He drof him out of engelond : ⁊ let him crie fleme • {Edwyn exiled dunston .} Þis godemon wende norþ wel glad : ne tok he neuer ȝeme • To þe abbeye of seyn amaund : biȝonde se he drouȝ • soiornde þer longe : ⁊ ladde goold lif Inouȝ • After kyng edwynes deþ : Edgar þat was is broþer Was kyng Imad uor he was : ner þen eny oþer Swiþe godmon he bicom : ⁊ louede holi churche • ech man þat him þerto radde : after him gan wurche • Me tolde him of seyn dunston : þat is broþer drof of engelonde • Wiþ unriȝt vor is godnesse : ⁊ gan him vnderstonde • After him he sende anon : þat he com aȝen sone • bileuede is conseler : of þat he hadde to done • {Edgar called back Dunstan} Seyn dunston com hom aȝen : ⁊ vayre was vnderuonge •

Last edit 12 months ago by KendallB
4
Complete

4

{donston 82} is abbei hadde al ins pes : fram wam he was longe • Wiþ þe kyng he was swiþe wel : ⁊ was al is conseler • Muche me spac of is godnesse : wide ver ⁊ ner • Hit byuel þat þe biscop : of wurcester was ded • {Dunston B. of Worc.} Þe kyng ⁊ þe erchebiscop ode : þer of nome her red • þe holi abbod seyn dunston : biscop hi made þere • To make him herre in godes lawe : is wille þei it nere Somme ecste of þe erchebiscop : of kanterbure sire ode • War uore he him biscop made : ⁊ is gret were so gode • Vor he schal quaþ þis godemon : after me her be • Erchebiscop of kanterbure : ⁊ þat me schal ise • Wat wostou þis oþer sede : þu specst folliche iwis • Nostou nammore þen þi vot : up god al it is • Mi leue frend quaþ þis godemon : ȝe ne dore me blame noȝt • Wel ichot wat our lord crist : In my mouþ haþ ibroȝt • As ho seyþ of þulke þinge : þat he haþ me ised • Telle ic may þei it biualle : after þat ic am ded • Biscop he was of londone : seyn dunston seyþe also Of londone ⁊ wycestre : he huld boþe two Hit biuel þat þe erchebiscop of canterbure was ded • Þe pope ⁊ þe kyng Edgar : þerof of nome hor red • Imade þe gode seyn dunston : erchebiscop þer •e {Dunst. B. of Cant.} Godemen þat him iknewe : wel glade þer of were Cristendom of engelond : to good stat he drouȝ þe riȝtes of holi chirche : he huld up uaste Inouȝ • He fourmede þoru al engelond : þat ech person scholde chese • To witi him fram lecherie chast : oþer is church lese • Seyn aþelwold was þulke tyme : biscop of wurcestre wynchestre seyn oswold þe godemon : biscop of wurcestre • Þis twei biscopes ⁊ seyn dunston : were al at one rede edgar þe gode kyng : to do þis gode dede • Þis þre biscopes wende aboute : þoru al engelonde • ech luþer person caste out : hem ne miȝte non at stonde • Hor chirchen ⁊ hor oþer good : clanlich hem bynome • bisette it on godemen : þoru þe popes grant of rome • Eiȝte ⁊ fourti abbeies : of monekes ⁊ of nonne • {48 Abbeis built.} Of þe tresour hi rerede in engelond : of persons so iwonne • so it was wel bet biset : þen it was er on strewen • Vor wenne gode maistres beþ : som godnesse hi wolleþ scewen •

Last edit 11 months ago by KendallB
5
Complete

5

Gode were þis erchebiscops : þat at one tyme were þo • Þe betere is engelond uor hem : ⁊ worþ euermo • Our lord ȝef anerþe : seyn dunston vaire grace • Þat at one tyme as he was : in apriue place • His fuder ⁊ is moder ek : In þe Ioie of heuene he sey an hey After þat hi dede were : aperteliche he sey • Wel gret loue our lord him cudde : wen he him scewede þere So muche os is priuete : þe wule he alyue were As he lay anoþer tyme : In is reste anyȝt He sei þe Ioie of heuene : ⁊ þe place þerinne wel bryȝt • Angeles he hurde also synge : a muri song þer Inne • Þat me syngeþ ȝut in holi churche : wenne me deþ þe masse bigynne Kyrieleyson Christeleyson : was þat muri song Þis holi mon þat þis ihurde : ne þoȝte noþing long • Wel auȝte he to heuene come : after is ende day • Wen he þe wule he was alyue : so muche of heuene isay • Harpe he loue swiþe wel : of harpe he couþe Inouȝ • A day he sat in is solas : ⁊ alay þer on drouȝ • Þe harpe he heng up by þe wouȝ : þo it was tyme to ete Þo it was ȝare þerto ibroȝt : he sat adoun to is mete • Of he gan to þenche þo : of Ioie þat was þere Of þe Ioiuol blisse þat þer was : ameng halwen þat þere were He sat as he were Inome : so muche þer on he þoȝte • His harpe he heng bi þe wowe : of wam he licte roȝte • Heo bigan to cuþe is holi þoȝt : ded tre þeȝ it were As our lordes wille was : þat hyrde alle þat were þere Al bi him sulf he gan to harpi : amuri antempne iwis • Þat me syngeþ ȝut in holi churche : þat an englisc is þis • Halwen soulen glade beþ : þat in heuene beþ ido • Þat siweþ our lordes wey : ⁊ uor hi scedde also Hor blod uor is swete loue : þeruore hi scholleþ wone kynges ben wiþþouten ende : wiþ crist godes sone • Þis antempne þat muri is : as þat folc hurden alle Þe harpe song al him sulf : as heo heng bi þe walle • Vair grace our lord him scewede þer : wen þat dede tre • So schulde synge of þulke Ioie : þat he schulde Inne be • Lord iheried be þin grace : ⁊ þi miȝte also • Þat þu wost uor him her alyue : such miracle do • Þo þis holi mon hadde ilyued : anerþe mony aday is ende day was ney icome : as he him sulf isay •

Last edit 11 months ago by KendallB
Displaying pages 1 - 5 of 6 in total