Bodleian Library Laud misc. 463

ReadAboutContentsHelp

Pages

1
Complete

1

SEint Donston was of engelond  come of gret more  Miracle oure lord dide for him  er he were y bore · For þo he was in his moder wombe  on Candelmasse day  Alle folk were at chirche þo  as to þe time lay · As þei stoden alle wiþ here light  as men doþ ȝette nowe  Here light aqueinte ouer al  here non wiste how · Here light brent swiþe wel  ac sone it was al oute  þe folk hadde gret wonder  ⁊ stod in gret doute · And as þei stode ⁊ speke þerof  in gret wonder echon  Seint donstones moder taper  a fyre worþ anon · Þat she held in here hand  she niste wheþen it com  Þe folk stod ⁊ biheld  ⁊ gret wonder þer of nom · Ne non niste whenne it com  bot thorw oure lordes grace  Þer of þei tenden al here light  aboute in þe place · Þe tokne was of þat holy child  þat in here womb was þere  Al engelond sholde beo in light  more þat it was ere · Þis child was boren nyne hondred ȝere  ⁊ fiue ⁊ twenti right  After þat oure swete lord  in his moder was alight  And in þe first ȝere of þe crounyng  of king Athelston  His moder het kindride  his fader het herston ·

Last edit 11 months ago by KendallB
2
Complete

2

Þo þis child was ybore  þe frendes tok þerto hede  Þei let hit do to glastenbury  to norisshe ⁊ to fede · To teche him his bileue  þe pater noster ⁊ þe crede  Þe child wex ⁊ wel they  as it moste neode · Litel ȝeme he tok to þe world  to al godnes he drow  Eche man þat herde of him speke  of him hadde ioye ynow · Þo he was of mannes wit  to his vncle he can go Þe erchebisshop of Canterbury  seint Aldelm þat was þo · Þat made wiþ him ioye ynow  ⁊ euer þe lenger þe more  Þo he sey of his godenes  ⁊ of his wise lore · Fore deinte þat he hadde of him  he let him sone bringe Bifore þe prince of engelond  Athelston þe kinge Þe king him made ioye ynow · ⁊ grantede al his bone  Of what thing so he wolde bidde  if it were to done · Þo bad he him an abbey · þat he was inne forþ brought  In þe toun of glastenbury · þat he him werne nought · Þe king granted him his bone anon  ⁊ after him also  Edmond his broþer þat was king  ⁊ in his poer do · To glastenbury went sone  þe godeman seint donston  Boþe þese kinges him ȝeue leue  edmond ⁊ athelston · Of þe hous of glastenburi  a gret ordeynour he was  ⁊ made mikel of here gode Reule  þat neuer er among hem nas · And þat hous was first bigonne  foure hondred ȝere bifore  ⁊ ek threo ⁊ fifti ȝer  er seint donston were bore · For þere was ordre of monkes  er seint patrik com  ⁊ er sein Austyn to engelond  broughte Cristendom · And sein patrik diede foure hondred  ⁊ two ⁊ fyfty ȝer  After þat oure swete lady  oure lord on erthe ber · At no monkes þer nere first  bot in hiding echone  ⁊ as men þat drowe to wildernes  for doute of godes fone · Seint donston ⁊ seint Athelwold  as oure lord besay I ordeined to prestes were  bothe in on day · Þer after sone to glastenburi  seint donston him wend · Abbot he was þer inne y mad · his lif to amende · And for he wolde bi his wille  no time ydell beo  A priue smeþi bi his celle  he gan him biseo · For whan he moste of his orisone  rest for werinesse  To wirken he wolde his hondes do  to fleo ydelnesse · Serue he wolde pore men  þe whiles he might dure  Alday for þe loue of god · he kept of hem non hure · So þat at a time he was  in threo maner stedes  His hondes þere  his herte at god his mouth to bidde his bedes · Þerfore þe deouel to him hadde  gret enuie ⁊ onde  A time he com to his smeþi alone him to fonde · Right as þe sonne ȝeode adone  as he a womman were ⁊ spak to him of his werk  with glad lauhwing chere · And seide þat she hadde wiþ him  gret werk to done  Trufling þe shrewe was here ⁊ þere  ⁊ in an oþer tale sone Þis holy man hadde gret wondur Þat she was here ⁊ þere He sat long ⁊ bithought him narwe Who þat it were · Þo he bithouȝt him who it was  He drow forþ his tange  And seide it in þe hote fyr  And spak faire lange · Til þe tong was al hoot  ⁊ sithe stille y now  Þe deuel he hent bi þe nose  ⁊ wel faste drow · He twynede ⁊ shok hi bi þe nose  Þat þe fyr out blaste  Þe deuel wrikked here ⁊ þer  he held euere faste · He ȝal ⁊ hipte ⁊ drow aȝein  And made grisliche bere  He nolde for al his biȝete  Þat he hadde com þere · With his tonges he strok his nose  ⁊ twinede euer sore  Til it was withinne night  Þat he might seo nomore · Þe shrewe was glad ⁊ blithe Þo he was out of honde  And fley ⁊ gradde bi þe lift  Þat men herde al þe londe · Out what haþ þis Calwe do  What haþ þis Calwe y·do  In þe contrey men herde wide  Hou þe shrewe gradde so · As goed þe shrewe hadde beo  I snyt at home is nose  He hiede nomore þiderward  To till him of þe pose · Þis holy Abbot seint donston  Hadde gret poer  Wiþ king Edmond þat was þo  ⁊ was his counseiller · After king Edmondes Day  A goed while was agon  Þat Edwine his sone was king  ⁊ not afterward anon · Þis edwine hadde yuel red  ⁊ þer after he drow  Wiþ seint donston he was wroþ Siker with gret wough · Of his abbey he dide him out  ⁊ dede him shame y now 

Last edit 11 months ago by KendallB
3
Complete

3

Þe more shame þat he him dide  Þe more þe godman low He drof him out of engelond · ⁊ let him crye fleme  Þis godeman went forþ ful glad He tok he neuer ȝeme · To þe Abbey of seint Amand · Biȝonde þe see he him drow  ⁊ soiorned þere longe  ⁊ ladde god lif y now · After king edwines deth  Edgar þat was his brother  Was king ymad for he was  nerre þan any other · Swiþe gode man he bicom  ⁊ louede wel holy chirche  ⁊ eche man þat him þerto radde After hem he gan wirche · Men tolde him of seint donston  Þat his broþer drof of londe  Wiþ vnright for his godnesse  ⁊ gan him to vnderstonde · After him he sende anon  Þat he com aȝein sone  And bileued his counseiller · Of þat he hadde to done · Seint donston com hom aȝein · And faire was vnderfong · ⁊ hadde his abbey al in pes  Fro wham he hadde be long · Wiþ þe king he was swiþe · wel  ⁊ was his counseiller  Muche men spak of his godnes  Wide fer ⁊ ner · It bifel þat þe bisshop · Of wircestre was ded  Þe king ⁊ þe erchebisshop Ode  Þer of nom here red · And þe holi Abbot seint donston  bisshop þei made þere  to make him herre in gode lawe  His wille þei it nere · He shal after quod þe erchbisshop  In mi stede here beo  Erchebisshop of Cantirbury  ⁊ þat men shal y seo · What wostou þis oþer seide  þou spekkest folich y wis  Nostou namore þan þi fot  vp god al it is · Mi leue frend qquod þis gode man  blame me nought Wel I wot þat oure lord  in mi mouþ it brought As who seiþ of þilk thing  þat he haþ in me seide  tell I may þei it bifalle  after þat I am dede · Bisshop he was of london  seint donston suche also  Of london ⁊ of wircestre  ⁊ held boþe two · It bifel þat erchebisshop  of Canturburi was ded  Þe pope ⁊ king edgar  þer of nome here red  And made þis seint donston · erchebisshop þere  Gode men þat him knewe wel glad þer of were · Ge fourmed thorw al engelond  þat eche person sholde chese  to holde him chaste fro lecherie  or elles his chirche lese · Seint athelwold was þo  bisshop of winchestre  And seint of wold þe gode man  bisshop of wircestre · Þese bisshops ⁊ seint donston  were at one rede  ⁊ Edgar þe gode king  to do þis gode dede · Þese threo bisshops went aboute  thorw al englond  And hiþer person caste out  þer might non hem astonde · Here chirches ⁊ here oþer god  clanliche þei hem binome  ⁊ bistte it on gode men  thorwe þe popes grant of Rome Eyghte ⁊ fourti Abbeyes  of monkes ⁊ of nonne  of tresor þat þei rered in engelond  of persons so y wonne And so it was wel bet biset  þan it was er on shrewen  For þere gode maistres beoþ  som godnesse wil sewen · Gode were þo threo bisshopes  þat in on time were þo · Þe bettre is engelond for hem  ⁊ worþ euer mo · Oure lord ȝaf on erthe  seint donston fair grace  Þat at o time as he was  in a priue place · His fader ⁊ his moder boþe  in þe Ioye of heuen on hey  After þat þei dede were  Apertliche he sey · Wel gret loue oure lord him kidde  whan he shewed him þere  So mychel of his priuete · whil he on liue were · As he lay an oþer time  in his bed a night  He sey þe Ioye of heuene  ⁊ þe place wel dight · Angels he herde also  singe a meri song þer inne  þat men singeþ ȝet in holi chirche  whan men mase bigynne  Kirielyson christeleyson  was þat meri songe · þis holy man þat herde þis  thought no thing long harpe he louede swiþe wel  of harpe he coude y now  A day he sat in his solace  ⁊ a lay þer onne he drow · þe harpe heng vpo þe wou  þo it was time to ete  þo it was þerto brought  he sat a don to mete · Of heuene he gan thenke sone  of ioye þat he say þere  of þe ioyeful blisse þat þer was  among halwen þat þere were · He sat as he were nome  so muche þer onne he thought  His harpe þat heng ope þe wow  of whom he litel rought · Bigan to kiþe his holy thought  ded treo þei it were As oure lordes will was  þat all herde þat were þere ·

Last edit 11 months ago by KendallB
4
Complete

4

Al bi it self bigan to harpe  A merie note y wis  þat men singeþ ȝette in holy chirche  þat on englissh is þis Alle halwen souled glad beoþ  þat in heuene be y do  þat seweþ oure lordes weie  ⁊ for him shedde also · Here blod for his swete loue  þerfore þei shole wone  ⁊ kinges beo wiþ outen ende  wiþ Crist godes sone · Þis is a steuene þat merie is  as þat folk herde alle  þe harpe song al bi it self  as it heng bi þe walle · Þo þis holi man hadde liuede  on erthe many day  ⁊ his ending day was neye come  þat him self say ·

Last edit 11 months ago by KendallB
Displaying all 4 pages