1

OverviewTranscribeVersionsHelp

Facsimile

Transcription

Status: Complete

SEint Donston was of engelond  come of gret more 
Miracle oure lord dide for him  er he were y bore ·
For þo he was in his moder wombe  on Candelmasse day 
Alle folk were at chirche þo  as to þe time lay ·
As þei stoden alle wiþ here light  as men doþ ȝette nowe 
Here light aqueinte ouer al  here non wiste how ·
Here light brent swiþe wel  ac sone it was al oute 
þe folk hadde gret wonder  ⁊ stod in gret doute ·
And as þei stode ⁊ speke þerof  in gret wonder echon 
Seint donstones moder taper  a fyre worþ anon ·
Þat she held in here hand  she niste wheþen it com 
Þe folk stod ⁊ biheld  ⁊ gret wonder þer of nom ·
Ne non niste whenne it com  bot thorw oure lordes grace 
Þer of þei tenden al here light  aboute in þe place ·
Þe tokne was of þat holy child  þat in here womb was þere 
Al engelond sholde beo in light  more þat it was ere ·
Þis child was boren nyne hondred ȝere  ⁊ fiue ⁊ twenti right 
After þat oure swete lord  in his moder was alight 
And in þe first ȝere of þe crounyng  of king Athelston 
His moder het kindride  his fader het herston ·

Notes and Questions

Nobody has written a note for this page yet

Please sign in to write a note for this page