Bodleian Library Tanner 17

ReadAboutContentsHelp

Pages

1
Complete

1

SEint Dunstan was of Ingelond : ⁊ come of good more · Meraclis oure lord dide for him : or he were I bore · For whan he was in his modir wombe : a candilmes day · Þere were folk at churche I nowe : as it to þe tyme lay · As he stoden alle wiþ here liȝt : and as men to ȝit now · Sodeinli it queinte at ones : ⁊ non wiste how · Riȝt as it brente wel : ⁊ was so sone al oute · Þe folk stode in gret wondir : ⁊ were þerof in gret doute · And how it queynte sodenli : þ liȝt þat þei seiȝe · bere · Alle þe folk merveile hadde : ⁊ in gret fere were · As þei stode and speke þerof : in gret wondir echon · Seint dunstanis modris tapris : a fere wixe anon · As sche it held in hire hond : sche nyste whens it cam · Þe folk þat stode ⁊ bi helde : gret wonder þerof nam · But onn wiste when it cam : but þoro goddis grace · Þerof þei tendid al here liȝt : a boute in þe place · What be tokeneþ þat but þat oure lord crist : þat liȝt fro heuyn sente · And þe folk þat stode a boute : here tapris þer of tente · But þoro þat holi child : þat in hire wombe was þere · Al ingelond schulde be liȝt : bet þan euere it were · Þe child was bore · ix · hondrid ȝer : and · xxv · riȝt · After þat oure lord : of his modir was a liȝt · And þe ferþe ȝer of þe corounynge : of þe king adelston · His modir hiȝte kynedride : ⁊ his fadir herston · Þo þis child was bore : his frendis toke to rede · Þei lete it do to glastyngbery : to noriche ⁊ to fede · To teche him ek þis bi leue : pater noster and crede · Þat child wix and wel theigh : as it moste nede · Lite ȝeme he tok of þe world : to alle goodnes he drough · Eche man þat herde of him speke : of him hadde ioye I nough · Þo he was of mannes witt : to his vncle he gan go · He made wiþ him ioie I nough : seint aldelm þat was þo · Þe erchebischop of caunterberi : ⁊ euer lengere þe more · Þo he seigh of his goodnes : and of his wise lore · For deynte þat he hadde of him : he let him sone bringe · Be fore þe prince of Ingelond : adelston þe kinge · {Donston}

Last edit 11 months ago by KendallB
2
Complete

2

Þe king made of him ioye Inough : ⁊ grauntid al his bone · Of þat þing þat he wolde bidde : ȝif it were to done · Þo bad he him an abbei : þere he was forþ brouȝt · In þe toun of glastynbery : þat he warned it nouȝt · Þe king grauntid him his bone : ⁊ aftir him also · Edmond his broþer þat was king : ⁊ in his powere was do · To glastingbery wente sone : þe goode man seint dunston Þat abbei þese kingis hem ȝeue : boþe edmond and adelston · Of þe hous of glastingbery : a gret ordeynour he was · And made meche of here goode reule : þat among hem neuere er was · And þat hous was first be gunne : foure hundrid ȝer to fore · And ek þre and fyfty ȝer : or seint dunston were I bore · For þe ordre of monkis : or seint patric com · And or seint austin to Ingelond : brouȝte cristindom · And seint patrik deide : foure hundrid and ·lij· ȝer · Aftir þat oure ladi : oure lord on erþe ber · But no monkis þere were first : but as in hidinge echon · And as men þat drowe to wildernes : for dred of goddis fon · Seint Dunston ⁊ seint adelwold : as oure lord it be say · Þei too pristis ordeyned were : boþe on oo day  Þere after sone to glastingbery : seint donston a non wente · Abbot he was þer in Imad : his lijf for to amende · And for he wolde not bi his wille : no tyme ydil be · A priue smytthe bi his celle : he gan him be se · For whan he moste of his orisouns : reste for werynes · To werke he wolde his handis do : to fle ydilnes · Serue he wolde pore men : whil he myȝte dure · Al dai for þe loue of god : he kepte of hem non hure · And whan he sat at his werk : he kepte of hem non hure · And his herte at ihesu crist : his mouþ bedis sede · So þat al at on tyme : he was at þre stedis · His handis at his werk · his herte at ihesu crist : his mouþ to bidde his bedis · Þerfore þe deuil hadde to him : gret envie and onde · A tyme he cam to his smytthe : ⁊ a lone him fonde · Riȝt as þe sonne ȝede a doun : as he a womman were · And spak wiþ him of his werk : wiþ laughinge chere · And seide þat sche hadde wiþ him : gret þing for to done · Triflynge sche smot hire : into an oþer tale fone · Þis holi man hadde gret wondir : þat sche was here and þere · He sat longe ⁊ be þouȝte him narwe : ho þat it were · Þo he be þouȝte ho it was : he drough forþ his tonge · And leide it in þe hote fier : ⁊ spac faire wol longe ·

Last edit 11 months ago by KendallB
3
Complete

3

Til þe tonge was al firy : and sithe stille Inough · Þe deuel he hente be þe nose : and wol faste drough · He wente ⁊ tok hire be þe nose : þat fier oute þere blaste · Þe deuil wrikkid hidir ⁊ þider : ⁊ he held euere faste · He ȝal ⁊ hupte ⁊ drough a ȝen : ⁊ made grisli bere · He nolde for al his bi ȝete : þat he hadde come þere · Wiþ his tonge he strok his nose : ⁊ twyned hem euere sore Til it was wiþ inne nyȝt : þat he myȝte so no more Þe schrewe was wol bliþe : þo he was out of his hond · And fleigh ⁊ gradde be þe weiȝe : þat men him herde in al þe lond · Out what haþ þis calwe I do : what haþ þis calwe I do · In þe contre men herde wide : how þe schrewe gradde so · As good þe schrewe hadde ben at hom : Ismyte on his nose · He hiȝed no more hidirward : to tilie him of þe pose · Þis holi abbot seint dunston : hadde gret power Wiþ þe king edmond þat was þo : ⁊ was al his counseler After king edmondis dai : a good while was Igon · Þat edwin his sone was king : ⁊ not afterward a non · Þis edwin hadde euil red : and þer after he drough · Wiþ seint dunston he was wroþ : sikir wiþ gret wough · Of his abbei he drof him out : ⁊ dide him schame Inough · Þe more schame þat he him dide : þe more þe goode man lough · He drof him out of ingelond : ⁊ let him crie fleme · Þis goode man wente forþ wol glad : he tok þerer of no ȝeme · To þe see of seint amand : be ȝounde þe se he him drough · And soiorned longe þere : ⁊ ledde good lijf Inough · After king edwines dai : edgar þat was his broþir Was king Imad : for he was ner þan ony oþer · A riȝt good man he bi cam : ⁊ louyd wel holi chirche · And eche man þat him þerto radde : after him he gan wirche · Men tolde him of seint dunston : þat his broþir drof of londe · Wiþ vn riȝt ⁊ for his goodnes : he gan him vnderstonde · After him he sente a non : þat he come a ȝen sone · And so bi leue his counseler : of þat he hadde to done Seint donston cam hom a ȝen : ⁊ faire was vndirfonge · And hadde his abbei al in pes : fro þe which he was longe · Wiþ þe king he was riȝt wel : ⁊ was al his counseller · Meche men speke of his goodnes : wide ferre and ner It be fel þat þe bischop : of wircetre was ded · Þe king and þe erchebischop ode : þer of toke here red · And þe holi aboot seint dunston : bischop þei made þere · To make him heiȝere in goddis lawe : his wille þeih it nere ·

Last edit 11 months ago by KendallB
4
Complete

4

Summe axid of þe erchebischop : of cauntirbery sire ode · Wherfore he him bischop made : ⁊ his graces were so goode · For he schal quod þis holi man : after me here I be · Erchebischop of caunterbery : and þat ȝe schul I do · se · What wost þou þese oþere seide : þou spekist folie I wis · Þou wost no more þan þi fot : in god al it is · An leue frendis quod þis goode man : ȝe þar me blame nouȝt · Wel Iwot what oure lord crist : in my mouþ haþat brouȝt · As ho seiþ of þat þing : þat he haþ me seid · Telle I may þouh it be falle : after þat I am ded · Bischop he was of londoun : seint donston also · Of londoun and wircetre : and held boþe too · It be fel þat þe erchebischop : of caunterbery was ded · Þe pope and þe king edgar : þer of toke here red · And made seint dunston : erchebischop þere · Goode men þat him knewe : glad þer of þei were · Cristindom of Ingelond : to good stat he drough · And þe riȝtis of holi chirche : he held vp faste I nough · He formed þoro al Ingelond : þat eche persoun schulde chese · To kepe him chast fro lecchorie : or his chirche lese · Seint adelwold was þat tyme : bischop of winchestre · And seint oswold þe goode man : bischop of wircetre · Þese too bischopis ⁊ seint dunston : were alle at on rede · And edgar þe goode king : to don þis goode dede · Þese þre bischopis wenten aboute : þoro al Ingelond · And eche liþer persoun casten out : hem myȝte not wiþ stond · And here oþer good clenli : þei hem be nome · And be sette it on goode men : þoro þe popis grace of rome · Xlviij abbeis : bothen of monkis and of nonne · Wiþ tresor þat þe a rerid in Ingelond : ot persouns Iwonne · And so it was bet be sett : þan it was er on schrewen · Þer as goode maistris ben : sum goodnes þei monn schewen · Goode were þese þre bischopis : þat at oo tyme were þo · Þe betere is Ingelond for hem : ⁊ schal be euere mo · Oure lord ȝaf seint donston : a wol fair grace · Þat on tyme as he was : in a pryuy place · His fader ⁊ his moder ek : in þe ioye of heuyn an heigh · After þei were dede : a pertlye he seigh · Wol gret loue oure lord him kedde : whan he him schewid þere · So meche of his priuete : whil he a lyue were · As he lai an oþer tyme : in his reste a nyght · He seigh þe ioye of heuyn : wondirly ful of liȝt ·

Last edit 11 months ago by KendallB
5
Complete

5

Angellis he herde also [?] : a merie song þer inne · Þat men synge in holi chirche : whan þe messe [?] Kyrielison christeleyson : was þe merye songe · Þis holi man þat þis herde : þouȝte no þing long · Wel auȝte he to [?] : al his [?] lay · Whan he whil he a lyue was : so meche of heyun say · Harpe he louede wel : of harpe he coude I nough · On a dai he sat in his solace : ⁊ a lay þerinne he brough · Þe harpe he heng on þe wough : þo it was tyme to ete · And þo it was þer to [?] : he [?] to his mete · Of heuyn he gan to priche sone : ⁊ of ioye þat was þere · And of blis þat þere was : a mong halwes þat þere were · He [?] no he were nome : so meche þerinne he þouȝte · Þis harpe þat heng bi þe wough : of whiche he lite rouȝte · He gan to ioye his holi þouȝt : ded tre þeih it were · As oure lordis wille was : þei herte all þat þere were · Al be it silue it gan to harpe : a meri gle Iwis Þat men synge ȝit in holi chirche þat on englisch is þis · Alle halwe soulis glade ben : þat in heuyn ben I co · Þat [?] oure lordis weiȝe : ⁊ sai him schedde his blod also · Here blod for his swete loue : þerinne þei schulde wone And kingis be wiþ outen ende : wiþ crist goddis sone · Þis is riȝt a meri steuene : as þe folk herdin alle · Þe harpe bi þe selue : as sche heng bi þe walle · Fair grace oure lord him sente : þat whan þe dede tre · So schulde synge of þe ioye : þat he schulde inne Ibe · Lord worschipid be þi grace : and þi myȝt also · Þat þou woldist so him here a lyue : merale Ico · Þo þis man had [?] lyued on erþe many a day · And his ende þo was neigh come : as he him selue say · On þe holi þorsdai he wiþ [?] : as fel in þe ȝere · He let soule after his frendis : þat [?] to him were · His men þat him serued ek : he let be clepe also · And forȝiue hem al here trespas : þat þei him hadde Ido · And asoiled hem of here synnes : as he in goddis bendis lay · And so he lai al þat day : ald also þe friday · He let clepe þe saterday : his breþere he [?] him alle · And bad hem alle good day : ⁊ wite what schulde be calle · He let him do alle his riȝtis : ⁊ oure lordis flesch name · His soule wente out of þis world : ⁊ riȝt sone to heuyn cam · Nyne hundrid ȝer ⁊ foure [?] : ⁊ in þe eighthe ȝer · He [?] þat oure ladi : oure lord on erþe ber ·

Last edit 11 months ago by KendallB
Displaying pages 1 - 5 of 6 in total