EN2
Here you can see all page revisions and compare the changes have been made in each revision. Left column shows the page title and transcription in the selected revision, right column shows what have been changed. Unchanged text is highlighted in white, deleted text is highlighted in red, and inserted text is highlighted in green color.
2 revisions | KendallB at Aug 17, 2023 07:26 PM 2Þe king made of him ioye Inough : ⁊ grauntid al his bone ·
Of þat þing þat he wolde bidde : ȝif it were to done ·
Þo bad he him an abbei : þere he was forþ brouȝt ·
In þe toun of glastynbery : þat he warned it nouȝt ·
Þe king grauntid him his bone : ⁊ aftir him also ·
Edmond his broþer þat was king : ⁊ in his powere was do ·
To glastingbery wente sone : þe goode man seint dunston
Þat abbei þese kingis hem ȝeue : boþe edmond and adelston ·
Of þe hous of glastingbery : a gret ordeynour he was ·
And made meche of here goode reule : þat among hem neuere er was ·
And þat hous was first be gunne : foure hundrid ȝer to fore ·
And ek þre and fyfty ȝer : or seint dunston were I bore ·
For þe ordre of monkis : or seint patric com ·
And or seint austin to Ingelond : brouȝte cristindom ·
And seint patrik deide : foure hundrid and ·lij· ȝer ·
Aftir þat oure ladi : oure lord on erþe ber ·
But no monkis þere were first : but as in hidinge echon ·
And as men þat drowe to wildernes : for dred of goddis fon ·
Seint Dunston ⁊ seint adelwold : as oure lord it be say ·
Þei too pristis ordeyned were : boþe on oo day
Þere after sone to glastingbery : seint donston a non wente ·
Abbot he was þer in Imad : his lijf for to amende ·
And for he wolde not bi his wille : no tyme ydil be ·
A priue smytthe bi his celle : he gan him be se ·
For whan he moste of his orisouns : reste for werynes ·
To werke he wolde his handis do : to fle ydilnes ·
Serue he wolde pore men : whil he myȝte dure ·
Al dai for þe loue of god : he kepte of hem non hure ·
And whan he sat at his werk : he kepte of hem non hure ·
And his herte at ihesu crist : his mouþ bedis sede ·
So þat al at on tyme : he was at þre stedis ·
His handis at his werk · his herte at ihesu crist : his mouþ to bidde his bedis ·
Þerfore þe deuil hadde to him : gret envie and onde ·
A tyme he cam to his smytthe : ⁊ a lone him fonde ·
Riȝt as þe sonne ȝede a doun : as he a womman were ·
And spak wiþ him of his werk : wiþ laughinge chere ·
And seide þat sche hadde wiþ him : gret þing for to done ·
Triflynge sche smot hire : into an oþer tale fone ·
Þis holi man hadde gret wondir : þat sche was here and þere ·
He sat longe ⁊ be þouȝte him narwe : ho þat it were ·
Þo he be þouȝte ho it was : he drough forþ his tonge ·
And leide it in þe hote fier : ⁊ spac faire wol longe · Þe king made of him ioye Inough : ⁊ grauntid al his bone · 2 |