British Library Addit. 10301

ReadAboutContentsHelp

Pages

1
Complete

1

de sancto dunstane
SEin donston was of engleond · y come of gode more Miracle oure lorde dude for him · ar he were y bore For þo he was in is moder wombe · a candel masse day Þat folke was at chirche ynon · as to þe tyme it lay As hy stode alle wiþ hore liȝt · as me doþ ȝut non Hor liȝt queinte ouer al · þat non nuste hou Her riȝt it barnde swiþe wel · ⁊ her riȝt it was al oute Þat folke stode in grete wonder / ⁊ was þer of in grete doute And hy speke eche to oþer · in wuche manere it were Hou it queynte so sodenliche · þe liȝt þat hy bere {//}And hy stode ⁊ speke þer of · in grete wonder echon Sein donstones moder taper afure worþ anon Þat ȝo hulde þer in hure hond · ȝo nuste wanne it com Þat folke stode ⁊ þat by hulde · ⁊ grete wonder þer of nom Ne non nuste wanne it com · but þorn is lordes grace Þer of hy tende al hor liȝt · aboute in þe place Wat was þat oure lorde crist· fram heuene þat liȝt sende And þat folke þat stode aboute · hor tapres þer of tende Bote of þat ilke holy childe · þat in hure wombe was þere Al engelond ssolde ben y liȝt · bet þan it euere were {//}Þis childe was y bore ix hondred ȝer / ⁊ xxv riȝt After þat oure swete lorde in is moder was aliȝt And þe verst ȝer of þe crounynge · of þe king aþelston His moder het kynedryde · is fader het herston Þo þis childe was an erþe y bore · is frendis nom þerto hede Hy let it do to glastinbury · to noryssþ ⁊ to vede To teche him eke is by leue · pater noster aue ⁊ crede Þat childe wax ⁊ wel y þey · as it moste nede Cyte ȝeiue he nom to al þe worle · to alle godenesse he drou Eche man þat hurde of him speke · hadde of him Ioye ynou Þo he was of mannes wit · to is vnese he gan go Þe erche bissop of kanterbury · sein aldelin þat was þo {165}
Last edit 8 months ago by KDase
2
Complete

2

Þat made wiþ him Ioye y non · ⁊ euere þe leng þe more Þo he y sey of is godnesse · ⁊ of is wise lore For deinte þat he hadde of him · he let hym sone brynge By fore þe prince of engelond · aþelston þe kynge Þe kyng him made Ioye ynon · ⁊ grantede al is bone Of wat þing so he wolde bidde · ȝif it were to done {//}Þo bade he him an abbey · þat he was on forþ ybroȝt In þe toun of glastynbury· þat · þat him ne wernde noȝt Þe king him grantede is bone anon · ⁊ after him also Edmond is broþer þat was king ·⁊ in is poer ydo To glastinbury wende sone· þe gode man sein donston Þo boþe þe kynges him ȝeue leue · edmond ⁊ aþelston Of þe hous of glastinbury · a gret ordeyn[a?]r? he was And made muche of hor gode rule · þat neuer er among hom nas Ac þat hous þat was ferst by gonne foure hondred ȝer by fore And eke þre ⁊ fifty ȝer / ar sein donston were y bore For þer was ordres of monekes · ar sein patric come And ar sein Austin to engelond · broȝte cristindome And seint patric deide foure hundred · ⁊ to ⁊ fifty ȝere After þat oure swete lady · oure lorde anerþe bere Ac non monekes þer nere ferst · bote as in hudynge echon ⁊ as men þat drow to wildernesse · for drede of godes fon {//}Sein donston ⁊ seint aþelwolde · as oure lorde it by say Iordeyned to prestes were · boþe in one day Þer after sone to glastinburi · sein donston anon wende Abbot he was þer Inne ymade · is lyf þeruore to amende And for he nolde by is wille · no time ydel be A pryue smieþþe by is celle · he gan him by se For wan he moste of is oryson · reste for werinesse To worke he wolde is honden do · to fle ydelnesse Seruy he wolde pore men · þe wile he myȝte dure Al day for þe loue of god · he ne kepte of hom non hure And wanne he sat at is worke þer · is honden at is dede And is herte at ihesuss crist · is mouþ is beden sede So þat al at one time · he was in þre studes Is honden þere· is herte at god · is mouþ to bidde is bedes {Donstane} {169} 91

Last edit 8 months ago by KDase
3
Complete

3

Þer fore þe deuel hadde to hym· grete envye ⁊ onde A time he com to is smiþþe· alone him to fonde Riȝt as þe sonne ȝede adon· as he womman were And spake wiþ him of is werke· wiþ liȝhynge chere And sede þat he hadde wiþ him· grete werke to done Truflynge he smot her ⁊ þere· in anoþer tale sone Þis holy man hadde gret wonder / þat ȝo was her ⁊ þere He sat longe ⁊ byþoȝte hym· narwe ho it were Þo he byþoȝte hym ho it was· he drou forþ is tongge And leyde in þe hote fure· ⁊ spake feyre wel longe Forte þe tonge was al afure· ⁊ suþþe scille ynou Þe deuel he toke by þe nose· ⁊ wel faste drou He twende ⁊ ssoke hure by þe nose· þat þe fure out blaste Þe deuel wrickede her ⁊ þere· ⁊ he huld euere faste He ȝal ⁊ hupte ⁊ dron aȝen· ⁊ made grisliche bere He nolde for al is by ȝete· þat he hadde ycome þere Wiþ is tonge he stroke is nose· ⁊ twenge him euere sore Forte it was wiþ inne niȝte· þat he ne miȝte se no more Þe ssrewe was glade ⁊ bliþe ynon· þo he was out of is honde And fley ⁊ gradde by þe lift· þat me hurde in to al þe londe Out wat haþ þis calwe y do· wat haþ þis calwe y do In þe countreye me hurde wyde· hou þe ssrewe gradde so As gode þe Srewe hadde y be· to smite atom is nose He ne hyeded nomore þuder ward· to tilie him of þe pose Þis holy abbot sein donston· hadde grete poer Wiþ king edmond þat was þo· ⁊ was al is conseiler After king edmond is deþe· a gode wile þer was agon Þat edwine is sone was kyng ymade· ⁊ noȝt after ward anon Þis edwine hadde vuel rede· ⁊ þer after he drou Wiþ sein donston he was wroþ· syker wiþ grete wou Of is abbey he dude him out· ⁊ dude him ssame ynou Þe more ssame þat hym dude· þe more þe gode man lou He drof hym out of engelond· ⁊ let him crie fleme Þis godeman wende forþ wel glad· ne toke he neure ȝeme To þe abbey of seint amant· by ȝende se he drou And so Iornede þere longe· ⁊ ladde gode lyf ynou {170} after king

Last edit 8 months ago by KDase
4
Complete

4

After king edwines deþe · edgar þat was is broþer Was king y made for he was · ner þan eny oþer Swiþe godeman he by com · ⁊ louede holy chirche And eche man þat him þerto radde · after hym he gan werche Me tolde him of sein donston · þat is broþer drof of londe Wiþ vnriȝt for is godenesse · ⁊ by gan him vnder stonde After him he sende anon · þat he come aȝen sone And by leuede is conseiler / of þat he hadde to done {//}Sein donston com hom aȝen · ⁊ feyre was vnder fonge And hadde is abbey al in pes · fram wan he was longe Wiþ þe king he was swiþe wel · ⁊ was al is conseiler Muche me spake of is godenesse · wyde fer ⁊ ner Hit byfel þat þe bissop · of Wircestre was ded Þe king ⁊ þe erchebissop ode · þer of nom hor red And þe holy abbot sein donston · bissop hy made þere To make him herre in god is lawe · is wille þei it nere Somme men esste of þe erchebissop · of kanterbury sire ode Ware fore he him bissop made · ⁊ is graces were so gode For he ssal quaþ þis gode man · after me here be Erchebissop of kanterbury · ⁊ þat me ssal y se Wat woston þis oþer sede · þon spexst foliche y wis Noston namore þan þi fot · vpe god al it is {//} My leue frend quaþ þis gode man · ne dorre ȝe me blame noȝt Wel y wote wat oure lord crist · in my mouþ haþ y broȝt As ho seiþ of þat þinge · þat he haþ in me y sede Telle y may þei it by falle · after þat y am dede Bissop he was of londone · sein donston suþþe also Of londone ⁊ of wircestre · ⁊ huld boþe to Hit by fel þat þe erchebissop · of kanterbury was ded Þe pope ⁊ þe kyng edgar / þer of nom hor red And made þe gode sein donston · erche bissop þere Gode men þat him y knewe · wel glade þer of were Cristendom of engelonde · to gode stat he drou And riȝtes of holy chirche · he huld vp fast ynou He formede þoru al englonde · þat eche person ssolde chese To wite him chast fram lecherie · oþer is chirche lese {Donstane} {171} 92 h I

Last edit 8 months ago by KDase
5
Complete

5

Seint aþelwolde was þat tyme · bissop of Wyncestre And seint oswolde þe gode man · bissop of wircestre Þis two bissopis ⁊ seint donston · were al at one rede And egar þe gode kyng · to do þis gode dede Þis þre bissops wende aboute · þoru al engelonde And eche luþer person caste out · hom ne miȝte non at stonde Hor chirchen ⁊ hor oþer gode · clanliche hom by nome And by sette it on godemen · þoru þe popes grant of Rome {//} Eiȝte ⁊ forty abbeis of monekes · ⁊ of nonne Of þe tresor hy rerde in engelonde of persons so y wonne And so it was wel bet by set · þan it was er on ssrewe For þere gode maistres beþ · som godnesse wolleþ ssewe Gode were þis þre bissops · þat at one tyme were þo Þe betere is engelonde for hom · ⁊ worþ euere mo Oure lord ȝaf a nerþe · sein donston feire grace Þat at one tyme · as he was in a priue place His fader ⁊ is moder eke · in þe Ioye of heuene an hey After þat hy dede were · aperteliche he sey Wel grete loue oure lorde him kudde · wan he hym ssowede þere So muche of is priuete · þe wile he alyue were {//} As he lay anoþer tyme · in is reste aniȝt He y sey þe Ioye of heuene · ⁊ þe place þer Inne wel briȝt Angeles he hurde al so synge · amurye song þer Inne Þat me singeþ ȝut in holi chirche · wan me doþ þe masse by gynne Kyrielyson xpe leyson · was þat murie song Þis holyman þat þis y hurde · ne þoȝte hym noþing long Wel aȝte he to heuene come · at is ende day Wan he þe wile he was alyue · so muche of heuene y say {//} Harpe he louede swiþe wel · of harpe he couþe y nou A day he sat in is solas · ⁊ alay þer on drou Þe harpe heng vp by þe wowe · þo it was time to ete Þo it was ȝare þerto y broȝt · he sate don to is mete Of heuene he gan to þenche sone · of Ioye þat was þere Of þe Ioyful blis þat was þere · among seyntis þat þer were He sat as he were ynome · so muche þeron he þoȝte His harpe þat heng by þe wowe · of wan he lite roȝte {172}

Last edit 8 months ago by KDase
Displaying pages 1 - 5 of 6 in total