British Library Egerton 2810

{Dunstanus} ¶ Of his abbeie he drof him out · ⁊ dude him sschame ynoȝ · Þe more sschame þa^t he him dude · þe more þe godeman loȝ · He drof him out of Engelonde · ⁊ let him crie fleme · Þis godeman him wende vorþ · ⁊ ne tok neuere ȝeme · ¶ To þe abbeye of seint Amound · be ȝonde se he droȝ · To soiorny þere longe · ⁊ ladde þere god lif ynoȝ · Aftir kinge edwynis deþe · edgar þat was is broþir · Was kinge ymad aftir him · vor he was ner þan eny oþir · ¶ Suþþe godeman he bi com · ⁊ louid holi churche · And eche man þat him þar to radde · aftir him he gan wirche · Ne tolde him of seint dunston · þat is broþer drof out of londe · Wiþ vnriȝt vor is godnesse · ⁊ bygan him vndirstonde ¶ Aftir him he sende anon · þa^t he com aȝen sone · And bileue is conseiler · of þat he hadde to done · Seint Dunston com hom aȝen · v vaire was vndiruonge · And hadde is abbeie al in pes · fram wan he was longe · ¶ Wiþ þe kinge he was swiþe wel ⁊ was al is conseiler · Moche me spak of is godnesse · wel wyde ver ⁊ ner · Hit biuelle þat þe busschop of Wircestre was ded · Þe kinge ⁊ þe erchebusschop ode þer of nome hore red ¶ ⁊ þe holi abbod seint dunston · busschop made þere · To make him herre in godis lawe is wille þei it nere · Som men esschte at þe erchebusschop · of cantelburie sire ode · Ware vore busschop he him made · ⁊ is gr^acis were so gode · ¶ Vor he sschal quaþ þis godeman · aftir me here be · Erchebusschop of cantelburie ⹎ · ⁊ þat me sschal yse · Wat wostou þis oþir sede þou spekist folliche ywis · Nostou namore þan þi vot · vp god al it is · ¶ Mileue vrende quaþ þis godeman · ne dorre ȝe me blami noȝt · Wel ichot þat oure louird crist in mine mouþ haþ ybroȝt · As wo seiþ of þulke þinge · þat he haþ in me ysed · Telle ich may þei it biualle aftir þat icham ded · ¶ Busschop he was of londone · Seint dunston suþþe also · Of londone ⁊ of Wircestre · ⁊ held boþe two · Hit biuille þat þe erchebusschop · of canterburie was ded · Þe pope ⁊ þe kinge edgar · þer of nome hore red · ¶ ⁊ madde þe gode seint dunston ⁊ erchebusschop þere · Godemen þat him yknewe · wel glad þer of were · Cristindom of engelonde · to god stat be droȝ · ⁊ þe riȝtis of holi churche he helde vp vaste ynoȝ ·

{Dunstasn} Þe fourme þorȝ al Engelonde · þat eche persoun sscholde chese · To witie him chaste fram lecherie · oþer is churche lese · ¶ Seint aþelwold · was þulke time busschop of Winchestre ⁊ seint oswald þe godeman · busschup of Wircestre · Þis twei busschops ⁊ seint dunston · were alle at one rerde · ⁊ edgar þe gode kinge · to do þis holi dede · ¶ Þis þre busschops wende aboute · þorȝ al engelonde · ⁊ eche luþer persoun caste out · hom ne miȝte on astonde · Hor churchin ⁊ hore oþir god · clanliche hem bynome · ⁊ bi sette it in godemen þorȝ þe popis gr^ant of rome · ¶ Eȝte ⁊ fourti abbeis · of monkis ⁊ of nonne · Mid þe tresour hir rerid in engelonde · of persouns so ywonne · Gode were þis þre busschops · þat at otime were þo · Þe betere is in engelond ȝut · ⁊ worþ euere mo · ¶ Oure louird ȝaf an erþe · seint dunston vaire gr^ace · Þat otime as he was · in awel prⁱue place · His vadir ⁊ is modir eke in þe ioye of heuene an heie · Aftir þat hir ded were · aperteliche he yseie · ¶ Wel gret loue oure louird him cudde · wan he sschewid þere · So muche of is priuete · þe wile he aliue were · As he lay anoþir time · in is reste aniȝt · He yseie þe ioye of heuene · ⁊ þe place þere in wel briȝte ¶ Angelus he sei al so singe · amurie songe þere inne Þat me singiþ ȝut in holi churche · wan me deþ þe masse bygunne · Kyrieleyson · cristeleyson · was þat murie songe Þe holi man þat þis yhurd ne þoȝt noþinge longe · ¶ Wel aȝte he to heuene come · aftir is ende day · Wan he þe wile he was aliue · so moche of heuene ysay · ¶ Harpe he louid swyþe wel · ⁊ of harpe he couþe ynoȝ · A day he sat in is solas · ⁊ alay þer on droȝ · ¶ Þe harpe he henge by þe wouȝ vp · þo it was time to ete · Þo it was ȝare þer to ybroȝt · he sat adoun atte mete · Of heuene he gan þenche sone · of ioye þat was þere · Of þe ioyful blisse þat þer was · amonge alwyn þa^t þere were · ¶ He sat as he were ynome · so moche þer on he þoȝte · Is harpe þat henge by þe wou · on wan he litte þouȝte By gan to cuþe is holi þoȝt · ded tre þei it were · As oure louirdis wille was · þat hurde all þa^t were þere · ¶ Al by him sulfe he gan to harpe · amurie anteme ywis · Þat me singiþ ȝut in holi churche · an englissche is þis ·

{Dunstanus} Alle halwin soule glad buþ · þat in heuene buþ ydo · Þat siwede oure louirdis wei · ⁊ vor hii sschedde al so · Hore blod vor is swete loue · þer vor hii sschulliþ wone · ⁊ kingis be wiþoute ende · wiþ crist godisone · ¶ Þis hanteyn þat murie is · as þat vowe · yhurdin alle · Þe harpe songe al him sulf · as he henge by þe walle · Vaire graec oure louird him sschewid þere · wan þa^t ded tre · Sscholde singe of þulke ioye · þa^t he sscholde in be · ¶ Þis holi man hadde yleuid · anerþe many aday · ⁊ is hende day was ney ycome · as he him sulf y say · An holi þorseday he worþ wike · as it vel in þe ȝere · Het of sende is frendis · þat specialis him were · ¶ His men þa^t him seruid ek · he let of clupie also · ⁊ vor ȝaf hom alle hore trespas · þa^t hii him hadde misdo · And asoylid him of hore sunne · ⁊ in godis bendis lay · ⁊ so he lay al þulke time · ⁊ al so þan friday ¶ He let clupie þan satirday · þe freris byuore him alle · ⁊ bad hom habbe godneday · ⁊ sede wat sscholde biualle And let him do alle is riȝtis · ⁊ oure louirdis flessche he nom · Is soule wende out of þe liue · ⁊ wel sone to heuene com · ¶ Nien hundrid ȝer ⁊ vour score · ⁊ in þe eȝteþe ȝere · He deide aftir þat oure louird an erþe liȝte here · Nou swete louird seint dunston · þa^t oure erchebusschop were · Bringe ous to þe ioye of heuene · þer angelus þine soule bere · {Amen}