3

OverviewTranscribeVersionsHelp

Facsimile

Transcription

Status: Complete

And beo þere wiþ oute ende · mid god þat us boȝte
Þe king stod þo he hurd þis · as þei he were in þoȝte
¶Swuþe fair þing it is he sede · þat ȝe bi hoteþ me
Were ich siker þat it were soþ · do ich wolde after þe
Ac Ine cosenti noȝt þerto · for it is ȝute nywe
Ar ich habbe more vnder ȝute · weþer þis message beo triwe
Ac for ȝe þus trauailed beoþ · fram so feorne londe
¶And for mine gode as ȝe seggeþ · and doþ me vnder stonde
Greui nel ich ȝou noȝt · ac faire bi ȝou do
And vnder fange ȝou and finde ȝou ek · þat ȝe habbe nede to
And ich grante al þulke ek · þat wolleþ to ȝou turne
Gode leue ich ȝiue echman · Inelle noman werne
Þis was atte ferste me þingþ · agod bigynnynge
Þer after was þe betere hope · to come to god endynge
¶Seint austin and alle his · aswuþe fair woninge
Þe kyng ȝaf in þe toun of douere · to don In hore prechinge
Seint austin and is felawes · bigonne to prechi faste
So þat somme þat gode were · to hom hore heorte caste
And turnde hom to critendom · euere þe leng þe mo
So þat folk aboute hom com · so þuke so it miȝte go.
¶Hore dede sprong so wide sone · þat to þe kyng it com
Þe faire miracles þat hi dude · as hi prechede critendom
Þe king wende and hurde hore prechinge · him þoȝte it was wel god
To longe he sede ich habbe abide · ar ich þis vnder stod
He turnde him to critendom · and let him baptise anon
And biluuede on Ihesu crist · and is men echon
So longe so þis holymen · hore wille hadde attenende
Þat þe folk of euerich toun · to critendom gan wende
¶Seint austin wende aȝen þo · þe pope he tolde at rome
Hou al þat folk of engelond · critendom nome
Þo was þe pope sein grigori · Ibroȝt in grete blisse
He het seint Aust to wende aȝen · þat londe bet to wisse
¶Seint Austin wende anon aȝen · and þo he þuder com.
Twelf bissops he made in þelond · to wardi critendom
Þe þritteþe he was him sulf · as ourre louerd ȝaf þe cas
Erche bissop at douere · þe ferste þat euere was
Seint austin broȝte critendom · þus to engelonde
Wel aȝte we is dai holde · ȝif wewerre wel vnder stonde
¶Is day toward þe ende of may · for þulke day he wende
Out of þis lyue to ihesu crist · þat after him þo sende

Notes and Questions

Nobody has written a note for this page yet

Please sign in to write a note for this page