Image du Monde en vers

Faonner si a grant descroit Quans ongles ron son ventre lors Tant que le faon en est hors Mes james puis faon navra Quant ainsi desciree sa Une maniere de jument Ja qui concovient dunent En quapadone une contree Mes nest que .iii. ans leur duree Cele part sont li olifant Grants bestes fors et conbatant Qui sen leur moustre devant eus Sen sont plus ^fier et orgueilleus Par touz leus sosent bien enbatre Cil dynde et de perse souvent Car bien portent une tor grant De fust plaine de gent armee Et est desus son dos fermee Un boel ont par devant Dont il menjue. large et grant

Dont bien prent .i. home et deveure Et lengloutit en petit deure Les gens alixendre qui fu Rois et contes de grant vertu Qui sen ala par mainte terre Plus plus por cerchier et por enqu^erre Con cil qui conbatre se dut Qui les olifans ot en rut Et apris de conbatre aplain Et fere fist .i. vessel darain Si come .i. home plain defex Que il menaient devant eus Pour conbatre a cele gent Qui erent sus les olifans Et quant li olifant getoient Les boiax dont les gens tuoient Si sardoisent les musiax tuit Tant que il les orent siduit Quaprochier nosoient les homes Pour la sa semblance de leur formes

Ainz metoient leur boiax haut Car il cudoient que si chaut Feussent tuit li autre con cil Einsi eschiva ce peril Alixendre qui mout fu sages Et conquist cele gent sauvages Et tanta si les olifans Que mal nosoient fere aus gens Olifans vont mout simplement Ensemble et mout acordement Et quant sencontrerent les chies bessent Ausi consil se saluassent De mout frede nature sont De quoi leur denz divyre sont Linges dras quant desus est mis Nart mie, ainz estaint charbonuis Tantost come desus * le met Pour la fredeur qui en lui est Nont faons cune foiz leur tens Quen leur ventre portent grant tens

.ccc. anz vit la soriz doute Couluevre et vermine redoute Se la couluevre a lui saert Si la bat et la vie en pert Ses faons arriere repont En bois ou couluevres ne sont Dedenz leue faonne ades Car sil cheoit de terre pres James ne se releveroit Car ses os sont entier et droit Et des le ventre jusquaus piez Quant il dort si est apoiez A .i. arbre et dort en estant Li veneeur qui vont cerchant Les arbres a quoi il sapoient Les trenchent par desouz et soient Si qua terre ne chieent pas Et cil qui ne set pas le cas Tant sapoient que il chiet jus Et ne se puet relever sus