Image du Monde en vers

Tant que touz ars et broiz est Et de la cendre un autre nest Puis vient damas et antioche Ou il a maint chastiau sus roche Palazine et puis samarie Sebaste et ^/.pantafelie ^/.puis Sodome et gorrome et i furent Deus citez quapareillier durent Cele partie est la mer morte Qui nule riens en lui ne porte Ismaelite une contree Et qui est ainsi habitee De .iiii. manieres de gens Porsivant egypte la grant Ou nue ne plue ne vient Qui .xxiiii. pueples tient Si a une autre regyon Qui est devers septemtrion Ou il ne repaire nus hon Fors fames fieres con lion

Qui vers les homes se conbatent En champ et tuent et abatent Armees coume chevaliers Et ont les treces par derriers Et sont mout fieres contre homes Et les apele on amazaines Si ont homes pres de leur terre Qui les viennent chascun anquerre Pour estre quinze jours ensemble Tant quont fet ce que bon leur semble Lors se departent et sen vont Et celes qui les enfanz ont Se fumele est si li retient Et le masle quen aage vient Norrissent par .v. ans ou sis Puis le gietent hors du pais Mout beles fames ra ailleurs Qui en bataille a estrous Usent toutes armes de gent Pour faute de fer feulement