Image du Monde en vers

Dont diex nous doinst si bon pooir Que nous puissons estre si hoir Mais de ce lairons ore ester Puis que oi aves raconter Comment les ars furent trouees Par ciaus de bonnes renoumees Si vous dirons de lor afaire Un petit queles sevent faire Car deles muet, tous sens humains Et toute oevre faite de mains Toute proesce, et aspretes Tous biens, et toute humilites Por ce me semont, ma matire Luevre de chascune descrire Et puis de nature, et dou monde Comment est fais ala reonde Mais des .vij. ars dirons avant Con ne doit pas geter au vent De la maniere des .vii. ars li .vii. capitles, la premiere ars gramaire LA premerainne des .vij. ars Dont il nest pas seus li quars Autans dore si est gramaire Sans la quele nus ne vaut gaire Qui de clergie vient aprendre Car sans li puet petit entendre Gramaires si est fondemens De clergie, et commencemens Si est la porte de science Par quoi on vient a sapience Des lettres, en gramaire escole

[initial: 20th row, opening initial /L/, 4 lines, in red with blue pen flourishing]