f. 87v

il est tout ensemble si povres et si riches si simple
et si sage · si obscur et si bel · si fiebles et si fort
si petit et si hault · et si grant et si bas · Sapience
dist bien fut nee la mere qui tel enfant porta · Ve-
rite respond plus ya · Car en bien fut nez qui sa
parolle croira et gardera · Sapience demande · de quel
vertu apperra cest enfant quant il venra en aage ·
Verite est en son corps apperra adoncquez · Apres
verra on de quel vertu ses petis pies sont que vous
veez · Car la mer tormentee quant il voudra les
portera a sec · Math · xxiiii · Si apperra aussi de quel
doulceur sont plains · Car par eulx baisier en bone
foy par devotion auront les pecheurs pardon de tous
leur pechies aussi comme ot la magdalaine ·
Luce · vii · Sapience dist voulentiers et desiranment
les doit on embrasser et baisier puis quil sont de
tel dignite et de tel doulceur Mais pour dieu or
parlons dez mains qui sont si fiebles maintenant
comme lez mains dun aultre enfant come sera monstree
leur vertu · Verite respond · Elles sont et seront
de tel vertu et si medicinables car pour atouchier
tant seulement les mors resusciteront · les malades
gariront · si nettes sont et seront que par atouchier sans
plus les mesiaulx netieront · si larges sont et
si plantereuses que par touchier et par baisier les
pains moultepliront · Sapience dist nulz nest di-
gnes de baisier telles mains et telz pies ce mest
advis · Verite dist · aucuns ne les baiseront pas