f. 88r

mais le crucifiront · Sapience dist · cest dure chose
de loir · et du faire · Apres dirons nous de la bouche
savoureuse qui maintenant quiert la mamelle ·
moult voulentiers en oiree la verite · Verite dist · et
je le te diray car il appartient a moy · Ceste bouchete
si est sur toutez aultres et sera gracieuse vertueuse
savoureuse · Si gratieuse que on sesmerveillera des
gracieuses parolles qui ystront de luy car oncquez
nul home ne parla ainsi · Numquam sic homo locutus est et
mirabantur de verbis gratie · Sur toutes autrez est
et sera vertueuse · Car a sa voix toute creature obey-
ra · la tempeste de la mer et les vens cesseront ·
les mors resusciteront · les anemis senfuyront ·
Sapience dist · moult a precieuse bouche · Verite dist ·
Aussi est elle savoureuse sur toutes les aultres
et doulce · Car de sa salive les aveugles renlumine-
ront et les muez la parolle raront · et de loudeur
de sa bouche les apostres le saint esperit en signi-
fiance de feu recepveront · Sapience sescria · O comme est
bien euree la mere qui telle bouche alaite · Et
qui souvent sent loudeur divine de si bel enfant
et qui baisier peult ceste doulce bouchette sa-
voureuse quant elle veult · Verite dist ceste bou-
chette aura fain et soif et si sera abrevee de
trois amers brevages · Sapience dist si est elle
bien digne que on luy porte honneur · Mais pour
dieu dites moy des yeulx joesnes et plaisans
quen sera il · Verite dist · il sont et seront de telle