f. 89v

manne qui tousjours asavoure et ne peult appe-
tissier la est rassasiee lame de toutes choses
en regardant la majeste divine qui est emplis-
sement de tous desirs · On doit bien estudier par re-
garder celuy qui est le tresbel peu congneu · Le
doulx mal assavoure · le riche mal servi · le sage
mal creu · le trespuissant peu doubtez · le bel peu
honnore · le courtois peu festies · Le sage peu mercies
le tres misericors peu prises · le loyal peu loes ·
le debonnaire peu aidie · le tres amiable peu ames ·
Qui longuement y penseroit · en pensant le desireroit ·
en desirant le sentiroit · en sentant se deliteroit · en
delictant sesjoiroit · en esjoissant languiroit · en
langissant navres seroit · navre damours sy se
mourroit · mort adieu · si se reposeroit ·

Saint augustin dit que cest vraye penitance
quant ceur domme porte doulcement en pacience
toutes les choses qui luy peust grever · Car
mieulx vault ung ceur doux et debonnaire
que ne fait vestir ne sac ne haire · Nulz ne
puet estre abel se il na cayn a frere · Indigne
est la vertu destre appellee vertu se elle nest enluminee
du contraire · Saint Jehan en lapocalipse dit que
ung net ceur est apparlie a tout souffrir · Saint
ambroise dit que aussi tost come une estincelle seroit
estainte en la mer sont tous les pechies que homme
pecheur pourroit faire pardonnez lors quil est vray