69v

[Column A]

la nature de lesturion
Hui mais deverions conteir
Dune grant merveille de meir
En meir sont li poisson divers
Com en la terre sont li vers
Et li oisel lassus en lair
Li un sont blanc li autre vair
Li un noir et li autre bis
Ensi entreaus je vous plevis
Sont li poisson diversement
Mais on ne puet mie ensement
De ceus les natures savoir
Com on fait des bestes porvoir
En la meir qui est grans et plaine
Est lesturions et la balaine
Et li torbot et li porpois
Et i· grans poissons li gras pois
Mais i· monstre ja merveillous
Trop cuivert et trop perillous
Cetus a nom selonc latin
As maroniers fait mal voisin
Autretex est comme sablon
La treste de son dos amont
Qant il se lieve en cele mer
Cil qui par la vvoelent aler
Cuident bien que une isle soit
Mais esperance les decoit
Par la grandor qui est en lui
Ilueques vienent a refui
Por la tormente qui les chace
Estre cuident a bone place
Lor avoir gietent en lor pont
Lor mangier cuisent lor feu font
Et por la neif bien atachier
Font grans pelx en sablon fichier

[Column B]

Qui samble terre a lor avis
Puis font lor feu je vous plevis
Qant li monstres la chalor sent
Dou feu qui deseur lui esprent
Dont se plunge par grant rador
Aval en la grant parfondour
Et fait o soi la neif plungier
Et toute la gent perillier
Tout autresi sont deceu
Li chattif dolant mescreu
Qui ou diable ont lor fiance
Et font delai et demourance
Et ouraigne que pechiez vient
dont la chaitive arme se dient
La ou il moins sen done garde
vient li leres cui mal feus arde
Qant bien les sent a soi ahers
O eaus se plunge tous envers
Enmi enfer ou plus parfont
cil sont peri qui la envont
Icist poissons quant fains le prant
bee la guole durement
Lors ist une si bone oudour
Qui est de si bone savour
Cele part vienent de randon
Maintenant li petit poisson
Si se lancent a moult grant foule
Trestuit ensamble ens en sa goule
Por loudour qui bone lor samble
Et cil clost les joes ensamble
Qant il sent bien sa goule plaine
Tous les transglout a une alaine
En sa pance qui est si lee
Come seroit une valee·