67r

[Column 1]
Qui na ne borde ne maisons
A dieu le faisons purement
Quile recoit benignement
Car si com il meismes dist
Et en levangile est escrit
Quant tout le mont jugier venra
A ceaus de destre part dira
Veneiz li beneoit mon pere
En sa maison quest bele et clere
Qui appareillie vous fu
Ancois que fussiez conceu
Qant nu et povre me veistes
Dont me peustes et vestires
Qant je oi soif vous mabevrastes
Hostes fui vous me harbreristes
Por ce en aveiz deservie
Joie et pardurable vie
Ces bones paroles orront
Cil qui a destre part seront
Itex paroles norront mie
Cil de la senestre partie
Il naront pas icel promesse
Ancois orront moult felenesse
Gens de male arie diex dira
Aleiz en feu qui ne faura
Ains neustes pitie de moi
Quant je avoie faim et soi
Ne me volsistes harbreger
Ne doner boivre na menger
Visiteir ne ensevelir
Ne moi chaucier ne revestir
Dont diront cil sire merci
Qant vous veismes nous ensi
Diex respondra a la persone

[Column 2]
Qant vous veistes le povre hommme
Ou povre fame ou orphenim
Ou mesaaisie pelerin
Qui por mamor queroit dou bien
Et vous ne lenfeistes rien
Dont me veistes pain querant
Et povre pelerin errant
Por ce irez en val parfont
Ou Sathan et diable sont
Cil lieus vous est appareilliez
Des que li mons fu commenciez
Por dieu segnor entendeiz ci
Qui tantes fois aveiz oi
Que larmone estaint le pechie
Faites bien au mesaaisie
Qu il por dieu vous requerra
Oiez quel bien vous envenra
Diex vous enmetra a sa destre
Amont en la gloire celestre
A la joie qui ne faudra
Mais ades sans fin durera
Et diex nous doinst ensi ovrer
Que la puissiens sans fin regner
[Image]
La nature de lasne sauvage
De lasne sauvage dirons
Le voir que ja nen mentirons
Si com li livres nous aprent
Qui ne faut pas ne ne et mesprent

[Image, col. 2, lines 24-29: Three wild asses on a platform held up by a devil figure; Two monks appear to their right - one in a red robe and another in blue. The monks appear to be standing in front of a castle. There is a basin in front of them and they appear to be holding people down in the basin. The image is smeared here, and it is unclear. The image has a gold leaf background.]

[Initial, col.2, lines 30-31, /D/, 2 lines, in red.]

[Marginalia: on the top right margin a roman numeral is added in black ink, lxviii, probably indicating an older pagination. Charta number is added on the top right margin in arabic numerals in red ink, 67]