Team Pelican

[column 1] Ci commence li bestiaires Qui bien commence et bien define Ce est veritez saine et fine. En toutes ovrengnes endoit Estre loez quex que il soit · Livre de bone commencaille Qui avra bone definaille Et bon dit et bone matire Voist Guilliaume en romans escrire De bon latin ou il le trueve Ceste ovrengne fu faite nueue Ou tans que phelippes tint france Ou tans de la grant mesestance Qengleterre fit entredite Si quil niavoit messe dite Ne cors mis en terre sacree De lentredit ne li agree Que a ceste foiz plus endie Por ce que droiture mendie Et loiautez est poure et basse Toute ceste chose trespasse Guilliaumes qui forment se dieut Nose pas dire ce quil vieut De la tricherie qui court En lune · et en lautre court Mais a plus haut dire se prent Car encest livre nous aprent Natures de bestes et meurs Peure iporrons molt tresgranz preus Ou molt avra moralitei Et bon pas de divinitei Ou lemporra essample penre

[column 2] De bien faire et de bien apenre Rimez iert par consonancie Li clers fu neiz de normendie Qui auctours est de cest romans Or oiez que dist li normans Qant diex primes le monde fist Et hommes et bestes imist A trestoutes ces creatures Ens posa diverses natures Et de toutes ce est la somme Donna la segnorie a lomme A homme donna tel franchise Quil solt que noistre la devise Qui est entre bien et le mal Et paradis et infernal Et quanquestre pooit en mer Mais par le pechie lucifer Qui fu angles et puiz maufeiz Fu hom et honis et gabeiz Et chaciez enfu en desert Dont nus qui damedeu ne sert Nistra jamais par tout le monde Ains chiet en abisme parfonde Dont nous ne retornera ja De dire com adans pecha Et coment il fu essilliez Et de saint paradis chaciez Et coment la lingnie crut Et qui nasqui et qui morut Et comment de les hoirs avint Et comment li deluges vint Comment larche fu compassee Et quel gent ot dedens salvee combien noe apres vesqui

[Image: Initial, col. 1, illuminated letter /Q/, six lines high in blue, with a tail that extends for an additional 18 lines, for a total of 24 lines. The Q contains interlace ornament in blue and pink, and the pink spiral terminates with the head of a creature (dragon?). Small beads in orange and gold terminate the tendrils of the interlace and further decorate the letter. The tail of the Q in blue is attached to the body of the letter by another creature's head biting it. The letter is enframed by a square in gold leaf, the spandrels of which are filled in with pink. The length of the blue tail is lined with gold leaf.]

[Image: Initial, col. 2, decorated letter /Q/ two lines high with a tail that extends an additional five lines down, in blue penwork with red filagree ornamental penwork that extends up and down from the Q between the columns.]

[Marginalia: Next to line 18, a later hand has added the date "1208"]

[column 1] Et coment abrahanz nasqui Et ysaac et ismael Et com disac vint israel Et ses jumeaux frere esau Et comment joseph fu vendu Comment il servi pharaon Qant il issi fors de prison Com israel fu en servage En egypte molt lonc aage Coment moyses lengeta Qui tant sovent adieu parla Et por cui diex fist tant miracle Quil fist larche et le tabernacle Et acui il dona laloi Qant li gieu de male foi Qui sont molt mescreant encor Aorerent le veel dor Coment apres moyses vint Josue qui qui lor loi maintint Et comment Gedeon le fist Qant la gent madian ocist Com le giu vindrent apres Qui jugierent le pueple engres Jusqa saul le premier roi Qui fu de si tresgrant desroi Vers david quisi preudons fu Coment Golias fu vaincu Com salemons le temple fist Qui pres de xl ans imist Com apres lui vint roboam Et comme dans Geroboam Fu donc les ·x· lignies rois Comment dont changierent les lois Qui aurains de tans rois dura

[column 2] Coment li pueples meserra Com il fu enchaitivison En babiloine en la prison Coment Jherusalem fu fraite Come ele fit apres refaite Coment li bon macabeu vindrent Qui la garderent et maintindrent Comment ele fis puis maumise Comment fu a rome sousmise Et grant dieus li dous et li pex De ses amis fu puis piteux Et puis coment il vint enterre Por sa saintisme oeille querre Coment il nasqui de marie Coment et par queil tricherie Eurent ocis li innocent Plus de ·xl· mil et cent Comment jhesucris preescha Qui lanovele loi dona· Com il fu puis encrois peneiz Et des espines coroneiz Coment fu ensepulcre mis Com il premist a ses amis Qautiers jor resordroit de mort Coment la neif vint dont auport Qui tant ot estei entorment Jevous dirat trestout comment Sainte eglise crut et flori Comment sains polx se converti Et cil martir qui tant soufrirent Qui tant dolerex fais soustinrent Comme seroit fort a retraire Mais vous orreiz dou bestiaire Essamples por le preu alame

[column 1] Or poez dieu et notre dame Que le nous puist ci si movoir La nature dou lyon Droiz est que premiere vous dison Dela meniere dou lion Lions es une beste fiere Et hardie de grant meniere Trois natures a principaus Li lions qui si est vassaus Chascune vous ensaurai dite La premiere est que il habite En granz montengnes par nature Qant ce avient par aventure Que chaciez est de veneor Deson espiel a grant paor Se tant est que alui atengne De moult long sent enla montengne Loudor dou veneor quil chace De sa coe cueure satrace Quil non puist suir ne baillier Ou lieu ou il se doit baillier De lautre nature est merveille Car quant il dort et liex veille En dormant ales ex overs Et clers et luisanz et apers La tierce nature ensement Est merveilleuse estrangement

[column 2] Et merveillex essample done Car quant la femele feone Li feons chiet sor terre mors De vie naura ja confort Dusques li peres autiers jor Lesoufle et leche par amor Entel meniere le respire Ne porroit avoir autre mire Enteil guise revient envie Or entendeiz que senefie Senefiance ia moult clere Qant dex nostre soverains pere Vint por nostre salvation Qui est esperiteiz lion Ici en terre par sa grace Si sagement couri satrace Conques ne l senti li veneres Qui ce fust ii nostres sauveres Et nature senmerveilla Coment li vint entre nous ca Dou veneor devez entendre Celui qui homme fait mesprendre Et qui lenchauce por ocirre Cest li maufeiz qui mal desirre Qant cis lions fu en crois mis Par les biex ses anemis Qui le jugierent a grant tort lumaniteiz si soufri mort Qant lesperit dou cors rendi En la sainte crois sendormi Si que la deiteiz veilla Autrement ne lentendez ja Se vouz volez resordre avie Car la deitez ne pot mie

[Image: Illuminated image between lines 3 and 4 in left column. Red/brown frame containing images of an orange humanoid hybrid, a man in red and blue robes carrying a lance on horseback, a tree, and three blue dogs or hyenas against a gold background.]

[column 1] Estre baillie ne sentue Ne escoopie ne batue Humanitei pueton baillier sanz la deitei empirier Si le monstrai par samblance Si nen devez avoir pesance T renchiez .i. arbre haut et grant Qant li solaus sera luisant Entrenchis dou premier colpel Verrez le soleil cler et bel Com plus ferrez de hache grant Li solaus par tout si espant Vouz ne poez le rai ferir Blecier ne peure ne tenir Trestout larbre poez trenchier Sanz le soleil point empirier Autresi fu de jhesucrist Lumanitei que por nous prist Qui por lamor de nous nesti Poine et traveil por nous soufri Ladeiteiz nen senti rien Ensi creez si ferez bien Qant diex fu mis en monument .iii. jors ifu tant seulement Et autierz jor le respira Li peres fil resuscita Ausi com li petiz lions Respira son petit feon OR vous avons dou lion dit Laveritei selonc lescrit Li lions fait molt grant noblece Car nul chaitif home ne blece Se il lencontre enmi savoie Ne ja si granz esfains ne lasproie

[column 2] A nul home mal ne fera Se devant correcie nela Li lions qui si est hardis Porte toute sa force el pis Qant atains est de veneor De son espiel a grant poor Escroissemens de roes crient Molt me merveil dont ce li vient Et de blanc coe grant poor a Ja quil puist ne lencontrerra La nature de lastalon Or vouz dirai dune autre beste Qui a .ii. cornes en la teste Si trenchanz com une alemele Iceste beste est molt isnele Que nous veneres ne latamt Se ele daler ne se faint Et si vouz os bien afichier Que de ses cornes puet trenchier .I. arbre grant et parcreu Ce est esprovei et seu Astalon ceste beste anon Et habite en la region Ou court li flueves deufrates Qant sois laprent si cort ades A ce flueve et de liave boit Qant beu a si vait tout droit Iluec pres a i. bois dalerz

[Image: Six lines in height, between lines 10 and 11 in the right column. On the left, a couple of lovers, the man in blue and red fondling the woman dressed in a pink gown. This couple is enframed within a pink arch. On the right, what appears to be a hunting scene. Both scenes are set against a gold ground and enframed in blue.]

[column 1] Molt espes et enroncinerz La sont li rame simenu Sibel si espes et si dru Ou la beste sevait frotant Iluec senvoise et joe tant Descornes aval et a mont Qui envolepes isont Qant ses cornes sont atachies Envirges qui sont bien dongies Et ele est prise ou roncenoi Com ·I· poissons en une roi Dont tire et saghe agrant pooir Qant ses cornes ne puet avoir Molt sesforce mais riens ne vaut Dont se corrouce et crie enhaut Que on le puet de long oir Donc muet li veneres dair Qui latrueve iluec ensarree Lors lafiert de hache ou despee Ou dautre glaive si locist Car ne puet ne grant ne petit Diluec fuir ne soi deffendre Lali convient la vie rendre Segnor ceste beste par foi Done grant essample de soi Iceste beste senefie Plusors homes qui sont en vie Qui ont ·ii cornes finement Cest luns et lautre testament Quil ont apris et recordei Et lun dedens lautre encordei Si quil ensegne tout le pas Mais por ce ne laissent il pas Quil naillent au buisson joer

[column 2] Et leur cornes envoleper Et qex buissons porroit ce estre Fors cest monde malvais terrestre Qui si est faus et decevanz Ou tant se joent li auquanz Quil isont pris et aronciez Li veneres bien le sachiez Est cil qui le fol home chace Tant quil lataint en cele place Sous le buisson et la locist Sanz deffense et sans contredit Car diex len suefre la baillie Porce fait cil mult grant folie Qui tant se delite et solace Ou monde que trop si enlace Quil nenpuet ses cornes retrairre Si me vient mult a grant contraire Des clers qui les ·ii· cornes ont Qui tint acoustumei lefont Et bien voient le veneor Qui les enchauce por ocirre Mais tout ades asoi le tire Lavaine gloire et li delit De cest monde qui les ocit Que touz les plus sages encombre Tant fait bel ester desouz lombre Dou buisson outant se delitent Que trop volentiers iabitent La les tienent li bel mengier Li bel boivre et soef couchier Li palefroi amblant et gras Lor et largent la grant pecune